Merkezê Îrtîbatî û Çapemenîye yê HPGyî bi eşkerayîyêke da zanayene ke bombardumanê dewleta tirke yê vera Bamernê de 2ê ci domanî 3 sivîlî şehîd bîyê û vera ‘xeberanê zûran’ ê medyaya PDKyî nêrazîbîyayîşê xo mojna.
Eşkerayîye wina ya:
”26ê gulane de qezaya Bamernê ya Amedîyê de wexto ke şarê ma yê Başûrî seyranî kerdêne netîceya bombardumanê dewleta tirke de nînan ra 2ê ci 3 domanî şehîd bîyî. Ma hêverî keyeyanê ercîyayeyan ê nê şehîdanê xo û şarê welatperwerî yê Kurdistanî rê serweşîye wazenê. No qirkerdişê Bamernê reyna têkilî û polîtîkayanê şaşanê PDKyî yê bi dewleta tirke ya îşxalkere eşkera keno.
Tay selahîyetdaranê PDK û medyaya PDKyî bi teşxeleyê sûcdarîye cade waşt ke nê qirkerdişî milê gerîlayan bikerê çunke ê nêrazîbîyayîşê heqdarî yê şarê ma ra tersenê. La şarê ma seba ke raştîye zaneno nê îftîrayan rê îtîbar nêkerd. Gerîlayî seba pawitişê rûmetê şarî û pawitişê Başûrî bedelanê pîlan danê, bi fedayîtî şer kenê û şehîdan danê la PDK seba ke îşxal û qirkeridşê dewleta tirke meşrû bikero xîret keno. Ganî PDK nê tewirî ra fek vera bido.
Artêşa tirke ya ke gerîlayan ra derbanê giranan wena, sena ke binkewtişê xo binimna pê destê PDKyî provakasyonan kena û zemînê şerê birakûjî virazena.
Verî zî medya de ame parekerdene ke PDK seba ke hetê dewleta tirke de şer bikero tay plananê gemarinan keno. 24ê gulana 2022yî de tay hêzan herêma Goşinê ya Sidêkanî de noqtaya gerîlayan de waşt provakasyon bikerê. Netîceya tewirê hîsgerî yê gerîlayan de verê provakasyonî ame girewtene. Artêşa tirke 25ê gulane de zî warê Girê Hekarî yê Metîna de waranê PDKyî ra erd û hewa ra derbaz bîye û hêriş kerd.
26ê gulane de Girê Şehîd Agirî yê Metîna de artêşa tirke bîye hedefê hêzanê ma. Na çalakîye de 2 îşxalkerî ameyî cezakerdene. Xeberê ke vanê hêzanê ma hêrişê hêzanê PDKyî kerdo, raşt nîyê.
Eşkera yo ke wextê winasênî yê binkewtişê artêşa tirke de PDK çira wina têgêreno û çira medyaya PDKyî xeberanê zûran keno. Şerê mabênê kurdan do dewleta tirke ya qirkere ra ber faydeyê çewî nêkero. Eşkera yo ke felaketo winasên do bibo sebebê kaos, bêaramî û rijîyayîşê Kurdistanî. Ma venga PDKyî danê ke nê tewirî ra fek vera bido ke do zerar bido şarê Kurdistanî.”
