Endamê Komîteya Merkezî ya PKKyî Kasim Engîn (Îsmaîl Nazlikulu) 27ê gulana 2020î de hêrişê hewayî yê dewleta tirke de warê Biradostî yê Herêmanê Pawitişî yê Medya de şehîd bibi. Komîteya Rayberdişî ya PKKyî Kasim Engîn bi eşkerayîyêke yad kerd. Eşkerayîye wina ya:
“Ma embaz Kasim Engîno ke hetê faşîzmê AKP-MHPyî ra amebi şehîdkerdene, bi rêzdarî û minetî yad kenê. Ma reyna soz danê ke vîrameyîşê ey bipawê û armancê ci bîyarê ca. Ma îfade kenê le serrgêra 3. ya şehadetê ci de rêçê şehîdan de serkewtişanê neweyan bivisnê destî.
Embaz Kasim Engîn şehîdanê pîlan ê menga gulane ra yew o. Karwanê Şehîdan o ke 18ê gulana 1977î de pê şehadetê Hakî Karerî kewtbi rayîr ewro pê şehadetanê embazanê Zap û Avaşînî dewam keno. Bi na wesîle ma xoverdayîşê tarîxî yê gerîlayan selam kenê û şehîdanê nê xoverdayîşî bi rêzdarî û minetî yad kenê.
Seke zanîyeno embaz Kasim Engîn qezaya ke binê hedefê qirkerdişî yê dewlete de bîya, Bazarcixî de dadîya xo ra bîyo, Ewropa de bîyo pîl. Ey ciwanîya xo de PKK şinasnaye û Ewropa de xebatê şorişî kerdî. Dima ey cuya Ewropa red kerde û verê xo da koyanê Kurdistanî. Welatperwerîya ci ya bi Kurdistanî, çêrî, fedakarî û hesreta ci ya azadîye rew ra o û PKK yewca de ard têhet.
Embaz Kasim Engîn perwerdeyê Rayberîye ra dima xeta Amanos-Toros, Botan-Başûrî de şer kerd û pêro xebatanê şorişî de ca girewt. Ey wextêkê dergî xebatê ajîstasyon û propaganda yê partîye koordîne kerdî. Ey pê zekaya xo ya tûje, enerjîya xo ya bêpeynîye, terzê xo yê afernayoxîye û kesayetê xo yê aktîfî xeylêk karî yewca de kerdî. Embaz Kasimo ke pozîtîf bi, giranîye dayêne ziwan û kulturê kurdan tim embazanê xo rê bi mîsal. Ey nê esasî ser o pêro cuya xo daye têkoşînê azadîye û bi hemrayê Rayber Apo û şarê kurdî.
Partî û şarê ma senî ke wayîrê vîrameyîşê pêro şehîdan vejîyayî, di serran o pê têkoşînê xo wayîrê Kasim Engînî zî vejîyayî. Seke zanîyeno 2020 û 2021 de têkoşîno tewr manadar û tarîxî qewimîya. Îqtîdarê AKP-MHPyî bi destekê NATOyî û hemkarîya PDKyî vera gerîlayan hêrişê îşxalî yê plankerde û rêxistinkerdeyî kerdî. Ma zî sey têgêrayîş, partî û şarî vera nê hêrişan bingeyê Şerê Şarî yê Şorişgêrî de xoverdayîşêko topyekûn kerd û nê xoverdayîşê xeta Şehîdan û Rayberîye de ma hêrişê îşxalî şiknayî. Gerîlayanê ma yê çêran Garê, Heftanîn, Xakûrkê, Metîna, Zap û Avaşîn de derbî dayî cerganê îşxalkeran ro, planê AKP-MHPyî pûç kerdî û îqtîdar berd noqtaya rijîyayîşî.
Nika serrgêra 3. ya şehadetê embaz Kasim Engînî de ma şerê Zap û Avaşînî asta seferberdîye de kenê. Gerîlayî her roje bi derbanê giranan faşîzmê AKP-MHPyî Zap û Avaşîn de kenê binê erdî. ŞEr vilayê pêro Tirkîya Kurdistanî beno û ciwanê kurdî her ca de vera AKP-MHPyî çalakîyan kenê. Çar parçeyanê Kurdistanî û teberê welatî de şarê ma û dostê ma vera dîktatorîya AKP-MHPyî her roje çalakîyanê protestoyî kenê. Hemleya ma ‘Wextê Azadîye’ xeta serfîrazîye ser o dewam kena. Destekê NATO û PDKyî û çekê kîmyewîyî nêeşkenê rijîyayîşê faşîzmê AKP-MHPyî, serfîrazîya Hemleya Serra 50.î asteng bikerê.
Eşkera yo faşîzmê AKP-MHPyî qetî do pê xoverdayîşê şar û gerîlayan ser nêkewo. Destekê Amerîka, NATO û PDKyî, tedaya faşîste, şantaj û terorî do nêeşkê AKP-MHPyî bixelisnê. Gerîlayî do bi derbanê giranan faşîzmê AKP-MHPyî Zap û Avaşîn de bikerê binê erdî. Nê esasî se ro Serra 50. ya Rayberîye û Partîye do biba serra serfîrazîya pîle.
Ma bi nê hawayî wayîrê embaz Kasim Engîn û pêro şehîdan vejîyenê û vîrameyîşê înan têkoşînê qehramanîye de pawenê. Ma nê esasî ser o embaz Kasim Engîn û pêro şehîdanê çêran reyna bi rêzdarî û minetî yad kenê. Ma venga hêzanê ma yê partî û gerîlayan, şar û dostanê ma, cinî û ciwanan danê ke tecrîdê Îmraliyî bişiknê û têkoşînê vera faşîzmê AKP-MHPyî her ca de berz bikerê.”
