Êrîşên ku dewleta tirk bi hevkariya PDK’ê di 17’ê Hezîranê de li herêmên Zap, Avaşîn û Metînayê yên Herêma Kurdistanê dane destpêkirin bi pevçûnên dijwar didomin. Ji ber pevçûnên dijwar di xeta Colemêrgê de her roj liv û tevgera helîkopeteran û leşkerî heye.
Rojên derbasbûyî di xeta Colemêrgê de li gor agahiyên me bi dest xistibûn 127 cerdevan biribûn herêma Zapê. Hat hînbûn ku pêr bi navê “Tîmên Şerker” 48 cerdevan ji navçeya Geverê birine herêma Zapê. Hat zanîn ku cerdevan ewilî birine herêma Oremarê dû re birine 34’emîn Fermandariya Tûgayê û ji vir jî bi helîkopteran birine herêma Zapê.
Li gorî agahiyên hatin bidestxistin, hat diyarkirin ku hema hema hemû qawişên Nexweşxaneya Sahrayê ku li qereqola leşkerî ya li gundê Gêmanê yê navçeya Çelê ya Colêmêrgê hatiye avakirin, bi leşkerên birîndar tijî bûye. Hat bilêvkirin ku gelek leşker naxwazin tev li êrîşan bibin û îstîfa kirina gelek leşkeran jî tên astengkirin.
