Dewa Xelîfanî ya qezaya Kanîreşî ya Çewlîgî de yeno plankerdene ke santralê termîkî bêro viraştene. Vera nê projeyî nêrazîbîyayîşî çend şino zafêr benê. Rêxistina Partîya Demokratîke ya Şaran (HDP) ya Çewlîgî waro ke yeno waştene ke tede sanral bêro viraştene de, eşkerayîye daye.
Endamê Meclîsê Pêroyî yê Bajarî yê HDPyî Îmdat Morsumbulî vat: ”Santral çimeyanê awe yê tebîî ya pîya do zirar bido xoza. Sanral do bibo sebebê rijnayîşê xoza. Rêxistinê komelê sîvîl û şarê Çewlîgî heqê xo yê demokratîkî şuxulnenê û wazenê wa no proje bêro betalkerdene. Ma pawitişê hemsencîya xoza sey wezîfeyê merdimî û berpirsîyarîye vînenê. No projeyê santralê komirî ke 1990yan ra nata rojdem de yo, ma vera ci yê. Ma nê wazenê wa awe û xozaya ma bibê leymin. Wa no proje cade bêro vindarnayene.”
Hetê bînî ra Mudirîya Pêroyîye ya Dezgehê Gurenayîşê Komirî yê Tirkîya prosesê îhaleyê santralî yo ke bedelê ci 15 mîlyon TL yo, da destpêkerdene. Dewijan vat înan hema xebere nêgirewta ke îhaleyo ke ewro do biamêyene kerdene, ameyo kerdene ya nê.
