Beşê Edebîyat û Ziwanê Tirkî yê Unîversîteya Munzurî de Wezîfedarê Cigêrayîşan Îlyas K.yî pê mesajan wendekarê cinîyî tacîz kerdî û wendekaranê camêrdan rê zî nêngî çinayî.
95 wendekaran pê waştişnameyêkî Rektorîye rê gerreyê Îlyas K.yî kerd, tay wendekaran zî qereqolî rê gerreyê camêrdî kerd.
Wendekar Fatîh Gungorî îfade kerd ke Îlyas K.yî ci rê heqaret kerdo û gefî wendê. Gungorî vat: ”Mi reya verêne çîyo winasên dî. Îlyas K.yî mi rê vat ‘Ez do to biqedîna. Peyê mi zixm o.’ Embazê ma yê bînî rê zî seba ke ber xurtî ra qefilnabi heqaret kerd. ”
Wendekarêka ke nêwaşt nameyê xo bida vat: ”Îlyas K.yî verî instagram de ez teqîb kerda, dima zî numareya telefonê mi waşte. O seba ke mamostayê ma bi, mi numareya xo zî daye. Dima ey mi rê fotografê mi waştî, waşt ma pîya şorê keyeyê ci. Mi vera ey reaksîyon mojna. Roja bîne ey venga mi da ke ez şora odaya ci. Di rojan ey mi rê wina mesajî şawitî. Dima ey mesajê do esteretî. Termînê verênî de zî sinife de pê çimanê xo ez aciz kerda. Termînê diyînî de ez nêkewta îmtîhananê ey. Vera tacîzanê ey ma 95 kesan gerreyê ey kerd.”
