Nuştox û sîyasetmedarê kurdî Eyup Barzanîyî Medya Haber de cewab da persanê rojnameger Fehîm Işikî û rewşa Başûrê Kurdîstanî ercnaye.
Eyup Barzanîyî derheqê rewşa Başûrê Kurdîstanî de wina vat: ”Meaş nêdîyeno yan zî kêm û erey dîyeno. Başûr de xizanîye meseleyêka cidî ya. La zengînî hîna benê zengîn. Estbîyayîş û tesîrê leşkeranê tirkan Başûrê Kurdîstanî de zêdîyenê. Başûr de bêusûlîyê keyeyê Barzanîyan vajîyenê. Zêdîyayîşê hesabanê înan ê bankayan, keyeyê înan ê neweyan, pereyê înan ê Ewropa. Her ca de qiseyê nînan yeno kerdene.”
Eyup Barzanîyî bale ant ser ke Edhem Barzanîyî rê destûr nêdîya ke roşan de bikewo Başûrî û vat: ”Edhemî bêusûlîyê înan zaf reyî rexne kerdêne ke rexneyê ci raşt ê. Ey îşxalê Başûrî, estbîyayîşê dewleta tirke û operasyonê Tirkîya rexne kerdêne. Coka vera Ethemî wina ame kerdene. Îdareyê Başûrî rexneyan ra aciz beno. Başûr de Qanûnê Dîwanxaneyî derbazdar ê. Tîya de wexto ke çew qala neheqîyan bikero hînî mîyanê îdareyî de nêno qebulkerdene. Metodê sey dûrvistişê merdiman û birnayîşê meaşî seba şiknayîşê kaseyetê merdiman o.”
Eyup Barzanîyî îfade kerd ke têkilîya mabê PDK û dewleta tirke hende aver a ke seke PDK teslîmê dewleta tirke bîyo. Barzanîyî vat: ”Îdareyê Başûrî de kontrol destê dewleta tirke de yo. Mabênê înan de hînî têkilîye ra wetêr yew torre est a. PDK teslîmê dewleta tirke bîyo. Mîsal Meydanê Teyarayan de kontrol destê Tirkîya de yo, petrol zî Tirkîya kontrol kena. Herême de leşkerê tirkî zaf ê, ajanî zaf ê. Ekonomîya Başûrî bi temamî destê Tirkîya de ya. Tirkîya Başûr de bîya axa. Ganî vera ney bêro girewtene. Hişmendîya şovenîste ya dewleta tirke îradeyê Başûrî visto destî.
Başûr de eleqeyê estbîyayîşê dewleta tirke pê PKKyî çin o. Ganî partîyê sîyasî yê Başûrî pîya têbigêrê û PKKyî reyde dîyalogan bikerê.”
