Endamê Komeleya 78an a Amedî Ganî Alkano ke şahîdanê rojanê Zîndanê Amedî ra yo, derheê tarîtîya 12ê Êlule û manaya 14ê Temmuze de ANFyî rê qisey kerd.
Ganî Alkanî ard ziwan ke Mazlum Doganî vera teslîmîyetî, ruhêko pîl ê xoverdayîşî vet werte, Çaran zî çalakîya Doganî ra hêz girewt û bedenê xo da adirî ver û 14ê Temmuze zî leweyo tewr berz ê wird çalakîyan bi. Alkanî vat: ”14ê Temmuze yeno manaya çinkerdişê planê Darbeya 12ê Êlule. Armanc awankerdişê Zîndanê Amedî no bi ke sîyasetê kurdan wa bêro çinkerdene. La eqsê ci bi.
Sîstemî xîret kerdêne ke kurdan bikero binê erdî la xoverdayîşê 14ê Temmuze sîstem çin kerd. Mîyanê ê şertan de ke tede teslîmîyet ameyêne ferzkerdene, xoverdayîş ame rêxistinkerdene. 14ê Temmuze serba kurdan mîrasêko pîl aferna. 14ê Temmuze asta tewr berze ya xoverdayîşê zîndanî ya.
O çax kar û xebatê xoverdayîşî zêdeyêr koxûşê 35. de ameyêne kerdene. Koxûş de Mazlûm, Hayrî, Akîf, Kemal û kadroyê bînî yê serkêşî est bîyî. Her kes qala zîndanê Amedî bi ziwanê mexdûrîyetî keno la qala xoverdayîş, tewirê tepişteyan hende nêna kerdene. Noqtaya tewr girînge ya tewirê tepişteyan no bi ke ‘Şima se kenê bikerê la qetî do nêeşkê mezg û fikrê ma, ma ra bigêrê.’ Ruhê xoverdayîşî wina bi.
Eke ewro êyê ke Rojawan de têkoşîn kenê vanê ‘Ma bi ruhê 14ê Temmuze xo ver danê’, no xêrê fedakarîyanê Kemal, Hayrî, Mazlûm û Çaran ra yo. Xoverdayîşê Zîndanê Amedî seba ma referans û mîras o. Ruhê xoverdayîşî yê 14ê Temmuze kurdê ewroyînî afernayî. Nê mîrasî ser o têkoşînêko pîl awan bi. Ruhê xoverdayîşê Zîndanê Amedî kurdî ardî yewca, ruhê yewîye zî awan kerd. O çax rojeyê mergî û çalakîyan de 11-12 embazê ma şehîd bîyî. Ganî kurdî naye hol fam bikerê.”
