Endamê Komîteya Rayberdişî ya PKKyî Murat Karayilanî cewab da persanê ANFyî û rojdem ercna.
Karayilanî verî şehîdê Rojeyê Mergî yê Pîlî yê 14ê Temmuze M. Hayrî Durmuş, Akîf Înan, Kemal Pîr û Alî Çîçek, 15 hezar qurbanê Qirkerdişê Gelîya Zîlane yad kerdî û pare kerd ke Xoverdayîşê 14ê Temmuze kurdî gandar kerdî û vistî mîyanê têkoşînî.
Karayilanî dima bale ante tecrîdê vera Rayberê Şarê Kurdî Abdullah Ocalanî ser û vat: “Roşanê Qurbanan de zî destûr nêdîya ke avûkat û keyeyî şorê Îmrali. Îmrali de sîyasetê qirkerdişî serdest o, tede exlaq, çêrî û huqûq çin ê. Sîstemê Îmraliyî a raşte vera pêro beşanê komelî û merdiman visîya dewre. Dormeyanê muxalîf û demokratîkan ê Tirkîya no hol fam nêkerd û ver nêvejîyayî. Coka destê AKP-MHPyî hîna bi bihêz. Bi nê hawayî înan sîstemê Îmraliyî pêro zîndanan ra vila kerd û dima zî vilayê teberî kerd. Eke vera tecrîdê Îmraliyî têkoşîn nêro kerdene hînî Tirkîya de edalet, huqûq û demokrasî binî ra qedîyenê. 16 mengî yo ma Rayber Apoyî ra xeberêke nêgênê. Rixmê hende kerdişan zî Rayber Apo pê fikranê xo pêro dinya de hîna zaf şinasîyeno. Ê se kenê bikerê nêeşkenê fikranê Rayberîye asteng bikerê. Ganî ma seba azadîya Rayberîye têkoşînî xurtêr bikerê, pîlêr bikerê û sîstemê Îmraliyî wedarnê. Ancax bi nê hawayî Kurdîstan azad beno, Tirkîya bena demokratîk.”
Karayilanî vist vîrî ke 14ê nîsane ra nata 3 mengî yo artêşa tirke ya îşxalkere hêrişê Herêmanê Pawitişî yê Medya kena. Karayilanî vat: “Ewro Zap, Avaşîn û Metîna de şerêko pîl est o û dewleta tirke detayanê nê şerî şarî ra nimnena. Ma nika şer de taktîkêkê neweyî anê ca; ma xo apey nêgênê. Reyna nika peyê cepheyê embazanê ke şer kenê, de embazê bînî est ê. Eşkera yo dişmenî seba nê şerî amadekarîyêka pîle kerda. Dişmenî seba ke vengê xo nêvejê û paştî bidê ci hêzanê Başûrî de xebatê dîplomatîkî kerdê, amadekarîyê leşkerî û teknîkî kerdê. Dişmenî seke Bahçelîyî vato waştêne ‘mabênê di roşanan’ de PKK biqedîno la nêeşka. Rixmê hende îmkanan zî dişmen pê xoverdayîşê gerîlayan nêeşkeno. Aseno dişmenî tay hêzê ke seba îşxalê Rojawanî verdabî, vistî dewre. Nika Çemço û Girê Amedîyê de nê hêzî şer kenê. Dewleta tirke şer de cara çeka kîmyewîye şuxilnayêne la nika zî çeka nuklere şuxilnena. Nika ê di çekanê nukleran şuxilnenê; bombayê nukleerî û bombayê termobarîkî.
Nê 3 mengan de dewleta tirke nêeşkaye netîce bigêra û a raşte bin kewta. Rejîmê AKP-MHPyî nêeşkeno ney îtîraf bikero. Ê ne derheqê kişteyanê xo de, ne derheqê detayanê şerî de agahîyan danê şarê xo. Dewlete cenazayanê xo nêgêna, dana bombayan ver. Yanî dewlete hem krîteranê şerî hem zî krîteranê exlaqî binpay kena. Dewlete seba ke bin kewena hêrişê sivîlanê Başûr, Mexmûr, Şingal û Rojawanî kena. Gerîlayî pê ruhê 14ê Temmuze, îdeolojîya Rayberîye, taktîk û metodanê afernayoxan xo ver danê. Nika ma taktîkêkê neweyî ceribnenê û wazenê pê Stratejîya Şerê Şarî yê Şorişgêrî dişmenî bin bivisnê, çekanê dişmenî bêtesîr bikerê, hêzê hewayî yê dişmenî bêtesîr bikerê û tedbîranê xo bigêrê. Xora eke tedbîranê xo ra nêbîyêne ma nêeşkayêne verê hêrişanê kîmyewîyan xo ver bidê. Dişmen binkewtişê xo qebul nêkeno, pêser hêrişan keno. Eşkera yo no şer do derg bibo. Ma zî serkewtiş de israr kenê.
Dewleta tirke nê şerî de 500 ra zêdeyêr kişteyî dayî la ancax 30-40 kişteyê xo eşkera kerdî. No îqtîdar kiştox o. Vano ‘ameyoxê ma Beka de yo.’ Çi karê dewleta tirke Başûr de est o? Şarê Tirkîya vêşan o la îqtîdarê AKP-MHPyî pê şovenîzmî çimanê şarî besteno. Dewleta tirke heta nika reya verêne hende kişteyan dana. Destê înan de gonîya ciwananê kurdan û tirkan est a. La ez înan rê vana ke şima pê kiştişî nêeşkenê PKKyî biqedînê, kurdan biqedînê! Çunke no şar zî, na partîye zî Kurdîstan zî raştî yê. Gerîlayê azadîye yê Kurdîstanî bêmexlûb ê! Ma seba kiştişî nê seba azadîye û demokrasî têkoşîn kenê. La dişmen seba îqtîdarê xo nê şerî keno. Şerê ma şerêko heqdar o, bingeyê erjanê merdimîye de yo.”
Karayilanî da zanayene ke dewleta tirke têna dişmenê PKKyî nê dişmenê pêro kurdan o û ê bi şerê xo Başûrî zî vera îşxalê dewleta tirke pawenê. Karayilanî vat: “Ez reyna vengê sîyasetê Başûrî dana ke çira kişta şarê Başûrî de şerêko hende pîl yeno kerdene la medya de ca nêdîyeno nê şerî? Dewleta tirke ha Başûrî îşxal kena. Rixmê ney zî hêzê Başûrî têna nê îşxalî seyr kenê. Raşt o ke PDK ho hetkarîya dewleta tirke keno. Xora hetkarîya PDKyî, bêvengîya Hukmatê Başûrî ra nêbîyêne dewleta tirke nêeşkayêne 3 mengan tîya de şer bikera. Seba ke hukmatê Başûrî bêveng o û dekewtiş û vejîyayîşê herêman girewte yê xebera çewî nê şerî ra çin a û merdimî hînî nê şerî normal vînenê. Bêvengîya hukmatê Başûrî zî heman netîceyan dana.
Gerîlayî hê vera artêşa tewr pîle ya diyîne ya NATOyî xoverdayîşêkê bêhempayî kenê. No xoverdayîş xoverdayîşêko tarîxî yo. Ganî pêro kurdî pê ney sereberz bibê. La ma vînenê ke tay kesî hemkarîya dişmenî kenê, tay kesî têna şerî seyr kenê û tay kesê bînî zî bi hawayêkê şexsîyî verê nê îşxalî vejîyenê. Wina nêbeno. Eke vera dewleta tirke tedaya sîyasîye est ba, dewlete nêeşkena dewam bikera. La hukmatê Başûrî eqsê ci kena û kerdişanê dewleta tirke mîyan kena. Mîsal dewleta tirke Bamernê de di domanî şehîd kerdî la tay dezgehanê medya vat ‘PKKyî kerd.’ Têna PDK nê partîyê bînî yê Başûrî zî bêveng ê û tehlukeyê raştikênî nêvînenê. Ma seba Başûrî şer kenê, çanteyê xo nêgênê nêşinê. Kam ke dewleta tirke de hemkarîye bikero rojêke dewleta tirke peynîya ey zî do bîyara. Ma wazenê ke wa her kes mesele hol fam bikero, destek medo kolonyalîzmê tirkan, verê îşxalî vejîyo. Ma wazenê wa tewirêko neteweyî bêro awankerdene. Ma seba ney veng dabi, ez reyna seba ney veng dana.
Dewleta tirke ha çekanê qedexekerdeyan şuxilnena. Hukmatê Başûrî nêverdeno heyetî bêrê û nê hêrişan ser o cigêrayîş bikerê. Saddamî verî hende kurdî pê hêrişanê kîmyewîyan qetil kerdbî. Nika Saddamêko newe vejîyayo werte û wazeno pêro kurdan bikişo. La selahîyetdarê Başûrî nêverdenê ke heyetî derbazê Silêmanî zî bibê. Senî ke medyaya tirkan de no şer yeno sansurkerdene, medyaya Başûrî de zî wina beno. Seba ke rojnamegerî derbazê herêmanê şerî nêbê û şerî çimdarîye nêkerê dekewtiş û vejîyayîşî yenê qefilnayene.
Nê destek û hetkarîyan ra dewleta tirke rixmo ke hende derbî werdî şer de israr kena û hêrişan rê dewam kena. Ez sere de dîyarê roşnvîran û hunermendan şarê Amedîyê, Bamernê, Deralok û Şêladizê venga pêro şarê Başûrî dana ke şarê ma hol zaneno ke ma seba çita şer kenê. Tay kesî vanê no şer rîyê PKKyî ra qewimîyeno. Wina nîya la ma vajê o qayde yo; o çax madem PKK şer keno tewr nêbo ti verê PKKyî megêre, dormeyê PKKyî megêre. PKK ho bedelan dano şer keno. Dişmen ho Başûrî îşxal keno. Wa her kes bêro hişê xo ser. Ma venga welatperweran danê ke wa xoverdayîşê ma têna meverdê, destek bidê ma. Destekê şarê ma zî seba ma manewîyatêko pîl o. Wa çew nêkewo mîyanê dafike. Teda est a la reyna zî şar eşkeno paştî bido ma. No şer şerê estbîyayîşî û azadîye yê kurdan o. Heta ke ma verê dewleta tirke nêgêrê nêeşkenê azad bibê. Wa her kes naye hol bizano. Coka no şer şerêko tarîxî yo û wa pêro welatperwerî heta ke destê înan ra yeno wa destek bidê ma.” Çime: ANF
