Badê Çewlîg, Şirnex û Êlihî ame zanayene ke qezaya Xozatî ya Dêrsimî de mengêke û nême ra nata qirkerdişê daran esto. Dewanê Samoşî û Zogarî yê qezaya Xozatî yê Dêrsimî de mengêke û nêm ra nata qirkerdişê daran est o ke nê dewî 1994 de ameybî vengkerdene. Dîya zanayene ke îhaleya birnayîşê daran dîyaye şîrketêka Meletî.
Serekê Komeleya Paştîdayîş û Kulturê Dêrsimî ya Îzmîrî Aslan Sultanî derheqê babete de Ajansê Mezopotamya rê qisey kerd. Sultanî pare kerd ke dewa ey Samoşî 1994 de amebî vêşnayene, vengkerdene û qedexekerdene. Sultanî îfade kerd ke dewê Samoşî û Zogarî par ameybî vêşnayene û vat: ”Xarpêt, Pali û cayanê bînan ra 60 keyeyî herêma Uzunyaziyî de xeyme naya ro û ê pê 30 traktoran daran birnenê. Tîya de armanco esas madenê zerdî yê. Na şîrketa Meletî kena ke waran daristanan ra pakî bikera dima zî xo birensa madenanê zerdî.”
Aslanî pê hesna ke dewijan vera talanê daran dewa akerda û vat: ”Birnayîşê daran dewam keno. Wa destê xo nêdê cografya û xozaya ma. Daristanê ma tarîxê ma yê. Dêrsim de zî sey Şirnexî qirkerdişê daran est o. Eke ma vera qirkrdişê daranê Şirnexî vengê xo bivetêne ewro Dêrsim de no qirkerdiş nêameyêne kerdene. Dewijê mi vanê eke wina dewam bikero dewe de darêke zî nêmanena. Qirkerdiş û hêrişêko cidî est o. Wa şarê ma verê xo bidê Kurdîstanî.”
