Hemleya 15ê Tebaxe ya serkêşîya Rayber Apoyî û binê fermandarîya Egîdî de kurdî welan ra newe ra afernabi, kewena serra 38. Gerîlayê YJA-Starî xeta serfîrazîye ya Egîd û Zîlane de bîyî hêz. Serkêşîya Fermandarê Bêmergî yê Fermandara Qerargehê Merkezî ya YJA-Starî Zozan Çewlike 15ê Tebaxe ra heta YJA-Starî qala gerîlatîya cinîyan kerde.
Hemleya 15ê Tebaxe Egîdî de 38 serrî yo bi bedelanê pîlan têkoşînêkê azadîye yo pîl yeno kerdene. Ma her wextî ra zêdeyêr nêzdîyê hedefê azadkerdişê Rayberîye yê.
Hemleya 15ê Tebaxa 1984î seba cinîyan ê kurdan zî wayîra manayêka tarîxî ya. Çalakîyê têkoşînê azadîye yê 15ê Tebaxe sey destpêkerdişê têkoşînê cinîyan ê vera serdestîya camêrdan, vera awanîya ci ya dewlete ya faşîste û vera raştîya komelkî ya klasîke, tradîsyonkî û koleker ê. Eke Hemleya 15ê Tebaxa nêameyêne kerdene îradeyê azadîye geş nêbîyayêne, têkoşînê azadîye yê cinîyan wayîrê şertanê geşbîyayîşî nêbîyayêne, YJA-Star nêvejîyayêne werte. Xêrê serkêşîya îdeolojîke û rêxistinî û teşvîkê pratîkî yê pîlî yê Rayber Apoyî, Têgêrayîşê Azadîye yê Cinîyan firsendê geşbîyayîşî vist destî, 40 serrî yo koyan de yo û çalakîya 15ê Tebaxe ra nata vera ferasetê serdestîya camêrdan û serdestîya dewleta faşîste tarîxêkê têkoşînî yo aktîf visto destî.
Îrade yeno manaya selahîyetê raşt tesbîtkerdişê lazimîyan, qerardayîşî û nê esasî ser o game eştişî yo. 15ê Tebaxe hetê averşîyayîşê îradeyê azadîya cinîyan, pratîzebîyayîşê armancê azadîye ra mîrasê ma yo tarîxî, hetê pratîkê têkoşînî ra zî noqtaya ma ya destpêkerdişî ya. 15ê Tebaxe gama verêne ya artêşbîyayîşê cinîyan a. Nê hetî ra embaz Egîdî zî hemrayo pîl ê cinîyan o. Senî ke têgêrayîşê cinîyan ê kurdan xo rê ‘xeta Zîlane’ esas gêno, xeta camêrdanê bi nasnameyê azadî zî xo rê xeta ‘Egîdî’ esas gêna.
Hemleya 15ê Tebaxe reyde Kurdistan de prosesêko biîdîa dîya destpêkerdene, Kurdistan bi ruhê Egîd û Zîlanan bi merkezê xoverdayîşî. Nê rojan de ke ma hê kewenê serra 39. ya Hemleya 15ê Tebaxe hêzê ma yê gerîlayan xeta Zîlane û Egîdan de şer kenê. Nê 38 serranê têkoşînî yew hêzê têkoşînî yo ke çar parçeyanê Kurdistanî de xo rêxistin kerdo û îlham dayo cinîyanê dinya, vet werte. Nê prosesî de şerê merkezê Zagrosan, hêrişê vera Rojawanî, hedefkerdişê şarê kurdî û coografyaya kurdan xizmetê armancê mendeyî yê dewleta tirke kenê. Têkoşînê YJA-Starî sey Hemleya 15ê Tebaxe wayîrvejîyayîşê azadîya şarê ma û cinîyan o. Coka Têkoşînê YJA-Starî temsîlê paradîgmaya Rayberîye yo. Gerîlayê YJA-Starî wayîrê mîrasê şehîdan û Rayberîye vejîyenê, çar parçeyanê Kurdistanî de zî mîsalê qehremanîyanê pîlan mojnenê.
YJA-Star sey hêzê serkewtişî û garantîya azadîye mîyanê nê şerî her roje pê çalakîyanê xo yê zengînan morê xo dano binê serkewtişanê neweyan, îradeyê xoverdayîşî yo ke rûmeto tewr pîl ê cinîyêk o, mojneno. Şexsê YJA-Starî de reyna hêzê cinîya kurde vejîya werte. Tewirê îradeyî yê nê hêzî moralê cinîyan zêdîneno û beno terso tewr pîl ê dişmenî. Şexsê Mizgîn, Ronahî, Nalîn, Tolhildan, Avzem, Şervîn, Şaristanan de na raştîye îsbat bîye. Şorişê Rojawanî zî sey îradeyêkê azadîye yê raştikênî xo mojneno ra. Hişmendîya faşîste tersê nê îradeyî ra hêrişê ci kenê. Tewr peyên serkêşanê Şorişê Rojawanî ra embazê ma Jîyane, Avesta, Barîne nê hêrişan de şehîd bîyî. Nê hêrişî kenê ke hêzê artêşbîyayîşê cinîyan asteng bikerê. Hedefkerdişê cinîyan yeno manaya hedefkerdişê şorişî. Dewleta tirke verî hedef kena ke îradeyê cinîyan ê serkêşan çin bikera. YJA-Star bi na hişmendîye vera hêrişan xo ver dano û bêcins, zûrker, qirkeran û dewleta tirke ya faşîste ra hesab perseno. Ma sey cinîyan ê kurdan hêzêko winasên ê ke pê îdeolojîya Rayberîye xo weye kenê, xeta Zîlane, Egîd û Bêrîtanan de ver bi serfîrazîye şinê. Rêçê Sara û Delal Amedan de ewro vejîya werte ke cinîyê kurdî refanê gerîlayan de senî têgêrenê, rolêkê senînî anê ca.
Operasyonê îşxalî yo kke 17ê nîsane de vera Zap, Avaşîn û Metîna dîya destpêkerdene, keweno menga xo ya çarine. Nê prosesî de embazê ma vera hêrişanê kîmyewîyan ê dişmenî rixmê kêmasîyan û şertanê zehmetan zî mojnenê ke şerê bi îradeyî eşkîyeno bêro kerdene. Nê embazê ma îsbat kenê ke eke cinîyî bi waştişê azadîye debibê eşkenê bibê hêzê têkoşînî yo tewr pîl. No averşîyayîşê gerîlayan hem temsîlîya raştikêne ya nasnameyê azadî awan keno hem zî xeta xayînî ya ke şexsê PDKyî de vejîyaya werte red keno. No şer keno ke pêro raştîyî vejîyê werte. Nê hetî ra serfîrazîya hêzanê ma yê ke tradîsyonê têkoşînê Hemleya 15ê Tebaxe resnenê ewro, qetî bena. Beno ke bi hawayêkê demkîyî mewzîyî vurîyenê la raştîya azadîye ya ke qetî bîya, eşkera bîya û pê destkewteyan zixm bîya îradeyê na raştîya azadîye nêeşkîyeno bêro binvistene, apeyberdene. Ma hê dekewtişê serra 39. de na serfîrazîye fîraz kenê.
Xoverdayîşê emserî sere de faşîzmê AKP-MHPyî xeta xayînî û hemkarîye ya PDKyî rê, şexsê înan de hêzanê mîyanneteweyîyan rê do bibê cewabêkê pîlî. Şerwan û fermandarê HPG û YJA-Starî çarçewa gerîlatîya modernîteya demokratîke de pê çalakîyanê xo yê bitesîran raştîyêke awan kenê. Pratîkê ma yê 38 serran, bi taybetî pratîkê ma yê 10 serranê peyênan eşkera kerd ke terzo şerê klasîk qedîyayo û terzê gerîlatîya bi Şerê Şarî yê Şorişgêro pê teknolojîyanê tewr pîlan zî eşkeno.
Raştîya Hemleya 15ê Tebaxe pê serkêşîya Rayber Apoyî, keda şehîdan, fedakarîya şarê ma û xoverdayîşanê pîlan tradîsyonê azadîye aferna û rêzê erjan zî vetî werte. Nê esasî ser o ma hê kewenê serra 39. ya Hemleya 15ê Tebaxe. YJA-Staro ke merkezê şehîdanê sey Sara, Zîlan, Sema, Gulan û Delalan o vera raştîya dewleta faşîste-camêrdî û kurdayetîya klasîke-xayîne heta ke serkewtişê qetî bivisno destî do şer bikero û nê erdî de reyna cuye do awan bikero.” BEHDÎNAN
