Di 29’ê tebaxê de balafirek bêmirov û bi çek ya dewleta dagirker a tirk malek penaberên wargeha Mexmûrê bombebaran kir. Di encama êrîşê de welatiyê bi navê Ebûzêd Abdulla Ubeyd şehîd bû.
Duh cenazeyê Ebuzêd bi girseyî hat veşartin. Ji bo Ebuzêd li ber der malê konê sersaxiyê hatiye danîn. Xelkê wargehê kom bi kom serdana kon dikin û sersaxî ji malbatê re dixwazin.
Di vê çarçoveyê de şandek Malbenda 20 ya Qereçox ya Yekitiya Nîştimana Kurdistan YNK’ê serdana konê sersaxiyê kir û sersaxî ji malbatê re xwest.
Fermandarê Xwebexş ê Pêşmergeyên YNK’ê Xazî Feysel ku pêşengtiya şandeyê dikir axivî û got; “Em bi vê bûyerê pir xemgînin, em ê her tim piştevanê we bin, hûn li hember van bûyeran tu caran bêdeng nebûn. Pêwîste kes li hember vê bûyerê bêdeng nemîne, çi ji destê me were em ê bikin, serkeftin ya gelê kurd e.”
