Makbule Ozera 80 serrî û bi nêweşîya girane Zîndanê Tîpê Tyê Wanî ra perê ameye tehlîyekerdiş. Makbule bi iddiayê “Hetkarîya rêxistine kerda” Artemêta Wanî de bi bahaneyê cezaya aye ya di serrî û aşmêke ameya tesdîqkerdiş, 9ê Gulane de amebî tepiştiş.
Ozere dîyar kerd, hewl daya problemanê xo bi kurdkî vajo û wina vat: “Dimayê ke mi tepiştî, mi şawitî zîndan. Uca de embazan seba lazimîyê min ê şexsî hetkarîya mi kerdî. Bi xêrê kursîya çerxe mi hereket kerdêne. Problemê min ê nêweşîya şekir û tansiyonî rî da. Ez bi nêweşa qelbî zî bîye. Di rojan ra reyke mi ardêne nêweşxane. Tewr peyîn zî seba ATKyî şîya Stenbol. Bi teyare mi berdî uca. Mi vat, ez bi tirkî nêzana. Bi kurdkî mi hewl da ez problemanê xo bîyarî ziwan. Dim ara mi reyna ardî Wan. Vizêr serê siba zî reyna seba dermanan mi berdî revir. Dimayê ke mi dermanê xo girewt, mi ra vatî ti ameya tehlîyekerdiş.”
‘Ganî aştî bi ca bêro’
Ozere daye zanayîş ke zîndanan de xeylêk tepişteyê nêweşî estê û wina va: “Waştişê mi oyo ke heme tepişteyê nêweşî û mêrdeyê mi Hadi Ozer bêro veradayîş. Ez wazena na game aştî bêro. Kesê ke qawişa mi de pêro ciwanî bî û tu sûcê înan çinbi. Ez hêvî kena ê zî na game bêrê veradayîş.”
Ozere dîyar kerde ke baş o seba sûcêke edlî nêameya tepiştiş û qedênaye: “Bi seyan cinîyê sey mi nêweşî zîndan de yê. Werrekna ê zî biameyîne veradayîş. Roja ke ez ameya tepiştiş heta nika xeylê paştdayîş dîya. Ez seba înan sipas kena. Mi tena nêverdayî. Ez vana ganî paştdayîşê pêro tepişteyan bêro kerdiş.” WAN
