Qezaya Dara Hênî ya Çewlîgî de serê Çemê Muradî de çar ocaxê xizî est ê û nê ocaxî hem weşîya merdiman hem zî xoza tehdît kenê. Ocaxî hem herikîyayîşê çemî rê tesîr kenê, hem waqayanê xeniqîyayîşî zêdînenê. Tewr peyên çem de Aydin Tutkal xeniqîya.
Şarê Dara Hênî seba ke ocaxî bêrê qefilnayene îmzayî arê dayî û waşt ke fîrmayê ocaxan bêrê kontrolkerdene. Îmzayî hetê Komeleya ‘Semedê Dara Hênî Yew Saete’ ra erşawîyayî Îdareyê Taybetî yê Şaristanî. Îdareyê Taybetî mengêke ra dima cewab da komele. Cewab de ame îdîakerdene ke serê Çemê Muradî de 4 ocaxê xizî yê 3 fîrmayanê taybetan û 1 fîrmaya dewleye est ê û ruhsatê înan est o. Reyna cewab de ama îdîakerdene ke cara ocaxî yenê kontrolkerdene.
Serekê Komeleya ‘Semedê Dara Hênî Yew Saete’ Anil Korkutî Ajansê Mezopotamya rê qisey kerd û vist vîrî ke Aydin Tutkalî mergê xo ra verî medyaya dîjîtale de tehlukeyê çemî ser o vilakerdişî kerdbî. Korkutî vat: ”Ocaxî herikîyayîşê çemî vurnenê. Çem 1 baskî ra ney 7-8 baskan ra cîya beno. No ekolojîya xoza rê zî zerar o. Wexto ke kamyonî yenê ocax toz beno berz. Ocax de lewha zî çin a. Merdimî vanê qey awe tay a la dima kewenê qulikanê xizî û mirenê.”
Korkutî îfade kerd ke ganî ocaxî bêrê qefilnayene û vat: ”Wa çem zî bêro islahkerdene. Wa çem şarî rê bêro akerdene, ocaxan rê ney.”
Endamê Meclîsê Pêroyî yê HDPyî yê Çewlîgî Îmdat Morsumbulî zî da zanayene ke muracatê şarê Dara Hênî şîyo Meclîsî zî û vat: ”Ocaxan ra yew 2023 de oyo bîn zî 2026 de bêro qefilnayene. Ma nika komîsyonê karma awan kerd û komîsyon do derheqê ocaxan de bire bido. Ma wazenê wa nê ocaxî bêrê qefilnayene.” ÇEWLÎG
