Esteyê Hakan Arslanî ke wextê qedexeyê tebervejîyayîşê kuçeyan de 2ê kanûna 2015î de qezaya Sûrî de dinyaya xo bedelna bî, badê 7 serran 29ê tebaxe de tewre de teslîmê pîyê ci ame kerdene. Esteyê ke aşma Teşrîna Peyêne ya 2021î de ameybî dîyarkerdiş ke se ra 95 aîdê Hakan Arslanî yî, Dezgehê Tibê Edlî (ATK) ra şirawîya Edlîyeya Amedî. Keye, Parlementera HDPyî ya Amedî Remzîye Tosun, rayîrberê rêxistina HDPyî yê Erzirom û Qereyaziyî şînî de bî.
Badê deqayêk rêzgirewtişî Hemsereka Komeleya Kultur û Yewîya Paştîdayîşê Hetkarîya Seba Keyeyanê ke Merdimê xo Domanê Şaristanîya Vînîbîyaye de Vînî Kerdî (MEBYA-DER) Meryem Soylu qisey kerd. Soyluye dîyar kerde ke kesê ke têkoşînê azadîya kurdî de cuya xo vînî kerdî, hurmet, ameyox û roşnaya kurdan î û wina vat: “Tehammulê înan ma rê çinî yo. Dayîk û pî qaseyê 7 serran cenazaya domanê xo gêrenî. Badê 7 serran cenazaya Hakan Arslanî tewre de dîyeno pîyê ci. Ê bin o hawa wazenê ke kurdan bitersnî. Fikirîyenê ke çinî bikerî. La nêzanê ke şexsê Hakan Arslanî de her ciwanêk beno se hezaran ciwanê kurdî. Nêzanê ke hêrs û kînê kurdan sed qat zêdêr beno.”
Pîyê Hakan Arslan Alî Riza Arslanî vat ke bi zîyaretan barê ci sivik beno û herkesî rê sipas kerd ke tewrê şînî bîyî û paştî dayî înan.
Badê qiseykerdişan keyeyê Hakan Arslanî heyeto ke seba şînî ame reyde şî zîyaretê goristanî. ERZIROM
