Cinîya kurde Jîna Emînî (22) hetê ‘polîsanê exlaqî’ yê rejîmê Îranî ra seba ke gijikê ci asayêne amebî qetilkerdene. Qetilkerdişê Jîna Emînî ra dima xeylêk şaristananê Rojhelatê Kurdîstanî û Îran de şar vera rejîmê Îranî serkêşîya cinîyan de vejîyabi war. Çalakîyî hema zî dewam kenê.
Rejîmê Îranî îdîa kerdbî ke Jîna Emînî meseleya xo ya weşîye ra merda. Avûkatê keyeyê Jîna Emînî Saleh Nikhbakhtî cewab da îdîayan û vat: “Îdîaya nêweşîye zûr a.”
Avûkatî da zanayene ke Îran de xeylêk kesî nezaretan de mirenê û vat: “Qetilkerdişê tepişteyan têna serebûtê Jîna de nêqewimîya.”
Avûkatî pare kerd ke ê nêpawenê ke kiştoxî do bêrê muhakemekerdene û keye wazeno ke seba cigêrayîşê serebûtî komîsyonêk bêro ronayene.
Qetilkerdişê Jîna Emînî ra nata protestoyî dewam kenê. Protestoyan de heta nika goreyê Rêxistina Heqanê Merdiman a Îranî (IHR) 76 kesî ameyî qetilkerdene, polîsanê Îranî eşkera kerd ke 1200 ksî ameyê destbendkerdene. Komîteya Pawitişê Rojnamegeran (CPJ) zî pê hesna ke 20 rojnamegerî zî wextê çalakîyan de ameyê destbendkerdene.
