Kampa Multecîyan a Şehîd Rûstem Cûdîyî (Mexmûr) û Silêmanî de qetilkerdişê Endama Merkezê Cigêrayîşî yê Jîneolojî Nagîhan Akarsel ame şermezarkerdene û mesajê pîlkerdişê têkoşînî dîya.
Mexmûr de şarî çalakîya rayraşîyayîşî kerd. Girse ver bi Ofîsê Neteweyanê Yewbîyayeyan (NY) şi. Çalakîye de sloganê sey ‘Şehîdî nêmirenî’, ‘Biciwîyo xoverdayîşê cinîyan’, ‘Cinîye, cuye, azadîye’ ameyî vatene. Endama Koordînasyonê Meclîsê Îştarî Fadîle Tokê verê Ofîsê NYyî de eşkerayîye wende.
Eşkerayîye de bale ameye antene hemkarîya îdareyê Başûrî ya bi Tirkîya ser û ame parekerdene ke Nagîhane temsîla cinîya azade bîya. Fadîlê Tokê vat: “Ma do xayînan ra hesab bipersê û qesasê Nagîhane bigêrê.”
Çalakîye bi sloganan qedîyaye
Silêmanî de bi seyan cinîyî û temsîlkarê dezgeh û rêxistinan seba Nagîhane Akarsel rayîr a şîyî. Çalakîya rayraşîyayîşî de sloganê ‘cinîye, cuye, azadîye’ ame berzkerdene. Çalakîye de Hemsereka Tevgera Azadî Tara Husên qisey kerd û vera hukmatê Başûrê Kurdistanî nêrazîbîyayîşê xo mojna. Tara venga hêzanê asayîşî da ke eke ê cinîyan nêpawê cinîyî do xo bipawê. Cinîyan dima bi çelenkê sîyayî çalakîya rayraşîyayîşî kerde û çelenk verê bînaya YNKyî de naro. Cinîyan tîya de zî çalakîya roniştişî kerde û bi sloganan vila bîyî.
