Suphan Çabuko ke serra 2016î de ame tepiştene û 16 kanûna serra 2020î ra heta nika Zîndanê Tîpa Lyî yê Kalkandere yê Rîzeyî de ameyêne tepiştene, vizêr ame qetilkerdene. Bado ke keyeyê Çabukî xebera qetilkerdişê ci girewt tewrê Hemserekê Komeleya Paştîdayîşê bi Keyeyê Tepişteyan û Hukmweran (TUAY-DER) yê Amedî Mehmed Gunduz, Hemserekê Partîya Demokratîke ya Şaran (HDP) yê qezaya Pasûrî yê Amedî Asim Ozgenî reyde kewtî rayîr û nîmeyê şewe de resayî Rîze.
Keyeyê Çabukî bi bermî û hawarî cenazaya xo Dezgeyê Tibê Edlî (ATK) yê Rîzeyî ra girewt û seba definkerdişî ver bi qezaya Pasûrî ya Amedî ra kewt rayîr. Heto bîn de Rêxistina HDPyî ya Rîzeyî zî verê ATKyî de kişta keyeyê Çabukî de ca girewt. RÎZE
