Endama Merkezê Cigêrayîşî yê Jineolojî û akademîsyene-rojnamegere Nagîhan Akarsele verê keyeyê xo yê taxa Bextîyarî ya Silêmanîye de hetê MÎTê dewleta tirke ra 4ê teşrîna verêne de Başûrê Kurdistanî de amebî qetilkerdene. Badê çend saetan kerdox serê zextê cinîyan û welatîyan de ameybî tepiştiş.
Badê ameyîşê endamê keyeyê Nagîhan Akarsel û heyete HDPyî 8ê teşrîna verêne de cenaza Silêmanîye ra ver bi Hewlêrî ameye erşawitiş. Nizdîyê 5 rojan cenaza Hewlerî de ameye vindarnayîş û bi bahaneyanê cîyayan erşawitişê cenaza ameye astengkerdiş. Her çend ke bilet bêro birnayîş zî bi waştişê balyozê tirkî Alî Riza Guneyî erşawitişê cenaza ya bi rayîrê hewayî ame astengkerdiş.
5 rojan keye û heyetê Hewlêrî gureyê huqûqî yê erşawitişê cenazeye reyde meşgul bîyî, la fîrmayê hewayî Pegasus û Turk Hava Yollari her çend ke biletê cenaza bidî zî dima ra berdişê cenaza red kerdî.
Nê caardişan ra dima keyeyê û heyetê HDPyî cenazaya Nagîhan Akarsele Teyaregehê Hewlêrî ra tepîya berdî û ver bi berê sînorî yê Îbrahîm Xelîlî ra kewtî rayîr.
Bado ke cenazaya Nagîhane resaye Berê Sînorî yê Xabûrî fermandarêko tirk heqaret bi cenazaye kerd. Nê gaman de Parlementerê HDPyî yê Şirnexî Huseyîn Kaçmazî reaksîyon nîşanê vatişanê leşkerî da. Badê munaqaşayan ewraqî ameyî temamkerdiş û cenazaya Nagîhane bere sînorî ra derbazê hetê bakurê Kurdistanî ameye kerdiş. Cenazaya Akarsele ber bi bajarê aye Konyaye ra ameye berdiş.
Cenazaya ke resaye Konya do gureyê otopsîyî ra dima ber bi dewa aye Golyazîya Cîhanbeylîyî ra bêra şirawitiş.
