Wekîlê Partîya Demokratîke ya Şaran (HDP) yê Îdirî Dr. Habîp Eksîk dima ke Gever de hêrişê polîsan de birîndar bi amelîyat bi û tedawîya ci dewam kena. Eksîkî derheqê rewşa xo de qisey kerd. Eksîkî vist vîrî ke goreyê Qanûnê Bingeyî her tewirê çalakîyî serbert ê û înan waşt ke nê heqê xo bişuxilnê la raştê hêriş û îşkenceyî ameyî.
Eksîkî vat: “Ma şarê xo reyde Merkezê Karan ê Zagrosî yê Geverî de ame yewca. Dima ke ma ameyî astengkerdene selahîyetdaran rê vat ke ma wazenê nê heqê xo bişuxilnê. La înan nêverda. Bi hawayêkê dişmenîye, seba birîndarkerdiş, kiştişî hêrişê ma kerd. Xebatkarê çapemenîye, şêwirmendê ma zî ameyî destbendkerdene û girse ma ra ame dûrvistene. Polîsan dima ez û Wekîlê Colemêrgî Saît Dede têna verdayî û hêrişê ma kerdî. 15-20 polîsan bi hawayêkê barbarî, dişmenî hêrişê Dedeyî kerd. Înan pê ço û kolîyan hêriş kerd. Ma waşt pê telefonî na rewşe qeyd bikerê, a hele polîsan hêrişê mi zî kerd. No hêriş qestî ra, bi hawayêkê plankerdeyî ame kerdene. Înan verî ma têna verdayî dima hêrişê ma kerd. Lingê mi hîrê cayan ra şikîyayo. Wexto ke ez pê hesîyaya ke lingê mi şikîyayo ez kewta war. La polîsan erd ke pê paskilan da mi ro.”
Eksîkî ard ziwan ke wexto ke babete kurdî û şorişgêrî bena demokrasî yena betalkerdene û ê zaf reyî raştê nê kerdişan ameyê. Eksîkî vat: “Ma do çarçewa huqûqî de hesanê ney bipersê. Ez her kesî rê sipas kena ke halê mi pers kerdo. Ez seba nê paştdayîşî sipas kena. Ma keyeyêko pîl ê û bi têkoşînî do ser bikewê. Serkewtişî ra ber ma rê rayîrêko bîn çin o. Coka ma do têkoşînî rê dewam bikerê.” Çime: ANF
