Suphan Çabuko (Bager Amed) ke serra 2016î de wextê xorayîrberdişî de ame tepiştene. 4 serran Zîndanê Amedî yê Tîpa Dyî de mend û 16 kanûna serra 2020î ra heta nika Zîndanê Tîpa Lyî yê Kalkandere yê Rîzeyî de ameyêne tepiştene. Çabukî 12ê Teşrîna Verêne yanî perê Zîndanê Kalkandereyî de ame qetilkerdene.
Keyeyê Çabukî bado ke xebera qetilkerdişî eşnawit tewrê Hemserekê Komeleya Paştîdayîşê bi Keyeyê Tepişteyan û Hukmweran (TUAY-DER) yê Amedî Mehmed Gunduz, Hemserekê Partîya Demokratîke ya Şaran (HDP) yê qezaya Pasûrî yê Amedî Asim Ozgenî kewt rayîr û cenazaya xo Dezgeyê Tibê Edlî (ATK) yê Rîzeyî ra girewt û vizêr serê sibayî saet 9î de resayî Amed. Cenazaya Çabukî qezaya Pasûrî ya Amedî de bi girseyî û berzkerdişê siloganan ameye pêşwazîkerdene û definkerdene.
Îşkence ame belgekerdiş
Wextê şitişê cenazaya Çabukî de Ajansê Mezopotamya ewja de bî. Wextê şitişê cenazaye de ame dîyîş ke bedenê Çabukî ser de şopê îşkenceyî estî. Ajansê Mezopotamya dîmen û fotogarafanê îşkenceyî ant. Hetê çepî yê pîzeyê Çabukî ameyo xêzkerdiş û sîya bîyo. Sewbîna mile ci yê çep û destê ci de zî sîyayê estî.”
Keye paweyê raporê otopsî yo. AMED
