Astengkerdişê vernîya vilakerdişê Rojnameyê Xwebûnî dewam keno. Rojnameyê Xwebûnî ke hewteyêkê ra reyke yeno çapkerdiş, no demêkê bîyo hedefe polîsan û polîs bêqerarê dozgerîye, bi hawayêkê keyfî asteng kenê. Ame zanayîş ke 15ê teşrîna verêne de vilakerdoxî semedo ke hûmara 148. ê rojnameyî bişawê Stenbol, şinê otogar û rojname teslîmê fîrma kenê. La dima ra polîsî bi hawayêkê bêqanûnî şinê verê fîrmayê ke rojname beno Stenbol û tehdîd kenê rojname xo dir nêbero.
Seke yeno zanayîş ke 17 û 18ê êlule de zî polîsan bêqerarê dozgerîye, hûmara 144î ê rojnameyî otogar de desteser kerdibî û destûr nêdabî ke rojname semedê Mêrsînî bêro şawitiş. AMED
