Fermandarîya Qerargehê Merkezê Pawitişê Şarî nasnameyê 17 gerîlayanê ke hêrişanê kîmyewîyan de şehîd bîyê eşkera kerdî.
Eşkerayîye wina ya:
“Hukmatê şerê taybetî AKP-MHPyî operasyonê îşxalî yê vera Başûrî de sûcanê şerî keno, vera şarê ma, hêzanê ma, sivîlan û masûman terorêkê barbarî ano ca. Dewleta tirke operasyonê îşxalî yê vera Garê/Sîyanê ra heta oerasyonê vera Zap, Avaşîn û Metîna bombayanê qedexekerdeyan, gazanê jehrînan û çekanê kîmyewîyan şuxilnena. Sîyana Garê, Zendûraya Metîna, waranê Mamreşo, Girê Sor, Aris Faris, Girê Kartal û Werxelê yê Avaşînî de artêşa îşxalkere 2021 de 367 reyî hêrişê kîmyewîyî kerdî û nê hêrişan de 46 embazê ma şehîd bîyî.
Rixmo ke kerdişê dewleta tirke sûcê şerî yê û dûştê qanûnanê mîyanneteweyîyan ê dezgehê mîyanneteweyî bêveng mendî û manenê. Dewleta tirke bi destekê NATOyî vera gerîlayanê ma bi her hawayî sûcî kena. Hukmatê AKP-MHPyî bêvengî û destekî ra cesaret gêno û 2022 de vera Başûrî konseptê hêrişanê kîmyewîyan dayo destpêkerdene. Artêşa tirke verî bombayê qedexekerdeyî û çekê kîmyewîyî cayanê cîyayan de bi hawayêkê munferîdî şuxilnabî la 2021-2022 de nê hêrişî kerdî sîstematîkî. ame tesbîtkerdene ke şerê şeş mengan ê mabênê 14ê nîsane û 14ê teşrîna verêne de dewleta tirke 2467 reyî çekê kîmyewî û bombayê qedexekerdeyî şuxilnayê. Ma verî nasnameyê 27 embazanê ke hêrişanê kîmyewîyan rayaumûmîye de pare kerdbî. Tewr peyên 17 embazê ma nê hêrişanê kîmyewîyan de şehîd bîyî.
Heyetê ke waştêne herême de nê hêrişan ser o cigêrayîş bikerê hetê PDKyî ra ameyî astengkerdene. Nê heyetan ra yew nêzdîyê 5 kîlometreyî yê Amedîyê de ame astengkerdene. La hêzanê ma cara binê şertanê kêman û zehmetan de zî dîmen û belgeyê nê hêrişanê kîmyewîyan pare kerdî. Rixmê ney zî rayaumûmîya demokratîke vera nê hêrişan nêrazîbîyayîşê xo nêmojna. AKP-MHPyî ney ra hêz girewt û seba ke verê gerîlayan de teng bi hawayêkê sîstematîkî hêrişê kîmyewî û bombayê qedexekerdeyî şuxilnayî.
Ame tesbîtkerdene ke gazanê kîmyewîyan reyde artêşa tirke bombayanê qedexekerdeyan zî şuxilnena. Dewleta tirke gazanê kîmyewîyan reyde verê tunelan de bombaya nuklere ya taktîke zî şuxilnena. Nê bombayî eşkenê cayêkê zixmî birijnê û cayêkê tengî de bibê sebebê mergî. Bombayê fosfor û termobarîkî zî wayîrê heman tesîrê bombaya nuklere yê û nê zî hêrişan de şuxilîyenê. Eke heyetê cigêrayîşî nêrê astengkerdene do bêro dîyene ke artêşa tirke hêrişanê kîmyewîyan şuxilnena. Ma sey MPŞyî bi zelalî beyan kenê ke ma do hetkarîya nê heyetan bikerê.
Rojanê peyênan de hêrişanê kîmyewîyan de warê Şikefta Birîndaran ê Zapî de 9, warê Karkerî de 5 û warê Werxelê yê Avaşînî de 3 embazê ma şehîd bîyî. Nînan ra şehadetê embaz Baz (Mehmet Can Evren) verî amebi eşkerakerdene la seba ke tedbîr bibo sebebê şehadetê ci nêamebi eşkerakerdene.
Artêşa îşxalkere Şikefta Birîndara, Karker, Werxelê, Girê Hakkarî, Girê FM, Girê Cûdî, Girê Amediyê, dewanê Sîda û Çemçoyî de nê sûcanê şerî rê dewam kena. Eke vera rejîmê AKP-MHPyî û artêşa tirke nêrazîbîyayîşêko xurt nêro mojnayene nê sûcî do dewam bikerê.
Ma venga pêro hêzan danê!
Şarê Kurdîstanî şaranê tewr qedîman ê na cografya ra yew o. Şarê kurdî seba ke erdê xo de bi azadî û bi kulturê xo biciwîyo heqê xo yê cuye paweno û naye ra hîna meşrû çîyêko bîn çin o. Hînî paştî medê nê polîtîkayanê qirker û nîjadperestan ê dewleta tirke. Mebê hemkarê nê sûcan! Cesaret medê qirkerdişan û hêrişanê kîmyewîyan ê Erdogan û Bahçelîyê faşîstî!
Ma venga pêro dormeyanê demokratîkan ê terefgîranê heqanê merdiman danê!
Sere de Neteweyê Yewbîyayeyê ke tim qîrayîşê kurdan peygoş kerdbî, ma venga pêro dezgehanê mîyanneteweyîyan, hêzanê demokrasî yê mîyanneteweyîyan, rêxistinanê komelê sivîlî û pawitoxanê heqanê merdiman danê ke hêrişanê dewleta tirke rê vajê ‘bes o’ û vera hêrişan û qirkerdişanê dewleta tirke tewir bigêrê.
Ma venga şarê xo yê welatperwerî û hêzanê demokrasî yê herême danê!
Vera dewleta tirke ya ke bi çekanê kîmyewîyan û bombayanê qedexekerdeyan hêrişê gerîlayan kenê bêveng nêmanê. Şarê Kurdîstanî û pêro şarê herême wa vera ney tewirê xo bi xurtî bimojnê û refleksî bigêrê. Sere de dezgehê demokratîk-welatperwerî yê Kurdîstanî wa cinî, ciwan û şarê ma, hêzê demokrasî yê Tirkîya û herême mesuldarîyanê xo bikerê.
Bi taybetî şarê ma yê teberê welatî û pêro dostê ma yê terefgîrê azadîye û demokrasî wa pêro dezgehanê ke sûcanê dewleta tirke mîyan kenê, teşhîr bikerê, seba ney çalakîyanê girseyan bikerê.
Ewro AKP-MHP Kurdîstan de vera erjanê merdimîye sûcan keno. Senî ke selahîyetdarêkê dewlete seba Terteleyê Dêrsim vatbi ‘ma jehrê mareyan ver da zereyê şikefteyan û pêroyî kiştî’ ewro zî bi hawayêkê sîstematîk û wehşî heman çi yeno kerdene.
Ma venga pêro dezgehanê demokratîkan û heqanê merdiman ê neteweyî û mîyanneteweyîyan danê ke erkê xo bikerê. Ma vengê pêro merdiman danê ke wayîrê qanûnanê mîyanneteweyîyan vejîyê û erkanê xo bikerê.
Wa her kes bizano ke gerîlayî çarçewa têkoşînê demokrasî û azadîye de, xeta Rayber Apoyî de bi taktîkanê zengînan û qerardarîya berze xoverdayîşî rê do dewam bikerê û na awanîya dewlete ya qirkere-kanwaze tarîx de çin bikerê. Paştdayîşê şarê ma, xeta demokratîke ya azadîgîrîya cinîyan, cesareto pîl, marîfet, qerardarî, xeta Rayberîye çimeyê gerîlayanê ma yê. No têkoşîn qetî şarê ma do biresno serfîrazîye. Ma sere de nê şehîdanê xo yê hêrişanê kîmyewîyan pêro şehîdanê xo bi minet û rêzdarî yad kenê. Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê.
Embaz Rûbar şaristanê Xoyî yê Rojhelatê Kurdîstanî de dadîya xo ra beno û 2010 de tewrê gerîlayan beno. O Herêmanê Pawitişî yê Medya de asta fermandarîye de wezîfe keno. Embaz Rûbar bi taybetî Kelaya Xoverdayîşî ya Şikefta Birîndaran de serkêşîya xoverdayîşî keno û kedêka pîle dano şerê tunelan.
Embaz Cîger Mûş de dadîya xo ra beno. O 2014 de Kobanê de vera DAÎŞî şer keno û dima verê xo dano koyan. Embaz Cîger bi taybetî Hemleya Şorişgêre ya Bazanê Zagrosan de çalakîyan de derbanê giranan dano dişmenî ro û beno fermandarêko mîsal. O Zap de serkêşîya terzê şerî yê tîmanê pisporan keno.
Embaze Helbeste Sêrt de dadîya xo ra bena û 2014 de tewrê gerîlayan bena. A warê Zapî de sey milîtanêka YJA-Starî şer kena û bena fermandare. A koordînatorîya xeylêk çalakîyanê serkewteyan kena û embazanê xo rê bena mîsale. Embaze Helbest bi îradeyê xo yê Apogîrî têkoşîn kena û bena şehîde.
Embaz Baz Amed de dadîya xo ra beno û 2014 de tewrê gerîlayan beno. Sere de Avaşîn o xeylêk cayanê Herêmanê Pawitişî yê Medya de şer keno û vera dişmenî bi aktîfî têgêreno. O nê prosesê tarîxî de bi mesuldarî şer keno û hêrsê xo yê vera dişmenî eşkera keno.
Embaze Mava Mûş de dadîya xo ra bena û 2014 de Botan de tewra gerîlayan bena. Embaze Mava sey fermandarêke Zap de wezîfe kena û bena tersa dişmenî. A tim tecrubeyanê xo zî embazanê xo de pare kena. A heta şehadetê xo zî kesayetê xo yê Apogîrî ra tawîz nêdana û bena fermandarêka efsanewîye.
Embaz Sedat Mêrdîn de dadîya xo ra beno û 2015 de vera hêrişanê DAÎŞî tewrê gerîlayan beno. Perwerdeyan ra dima o derbazê Zapî beno û tîya de kedêka bêhmepa mojneno ra. O sey fermandarêkê serkêşî pêro wezîfe û mesuldarîyanê xo ano ca.
Embaze Delale Silêmanî de dadîya xo ra bena û 2017 de tewra gerîlayan bena. A verî mîyanê Hêzanê Taybetan de cagêna û Zap de sey gerîlayêka YJA-Starî dişmenî ra qesas gêna. Embaze Delale bi fedakarî, bawerî, çêrî û îradeyî heta şehadetê xo şer kena.
Embaz Demhat Kobanê de dadîya xo ra beno û 2018 de Herêmanê Pawitişî yê Medya de tewrê gerîlayan beno. Embaz Demhat bi layîqî pêro erkanê xo ano ca û tunelanê şerî vurneno keno cepheyê xoverdayîşî.
Embaz Demhat Cizîr Botan de dadîya xo ra beno û wexto ke ciwan beno Cûdî de tewrê gerîlayan beno. O Zap de şer keno û amadekerdişê tunelanê şerî rê kedêka pîle dano. Embaz Demhat Cizîre tunelanê şerî de bi çêrî vera dişmenî şer keno û pê têkoşînî şehîd beno.
Embaze Zinarîne Şirnex de dadîya xo ra bena û karanê ciwanan ra dima 2014 de tewra gerîlayan bena. Embaze Zinarîne mîyanê Komalanê Ciwanan de ca gêna û dima derbazê Zapî bena. A Zap de bi fedakarî şer kena û pratîkêkê serkewteyî mojnena ra ke dişmen firsend nêvîno.
Embaz Rêber Kobanê de dadîya xo ra beno û xoverdayîşê Kobanê ra dima tewrê gerîlayan beno. Embaz Rêber mîyanê gerîlayan de bi taybetî torra embazîye ra bitesîr beno û tim perwerê partîya ma beno. O heta şehadetê xo vera dişmenî bi çêrî têkoşîn keno û tim goreyê krîteranê Apogîran têgêreno.
Embaze Ruksen Qamişlo de dadîya xo ra bena û 2014 de tewra gerîlaya bena. A Metîna de xeylêk gerîlatîye kena, uca ra derbazê Zapî bena. Embaze Ruksene Zap de pê kesayetê xo bena çimeyê moralî yê embazanê xo û bi aktîfî mîyanê Hemleya Bazanê Zagrosî de cagêna.
Embaz Xemgîn Cizîre de dadîya xo ra beno û 2014 de tewrê gerîlayan beno. O verî Garê de gerîlatîye keno û dima derbazê Zapî beno. Zap de o serkêşîya çalakîyanê pîlan keno û bi cidîyetî nêzdîyê mesuldarî û erkan beno. Embaz Xemgîn Zap de derbanê giranan dano dişmenî ro.
Embaz Rêber Wan de dadîya xo ra beno û 2015 de Zagrosan de tewrê gerîlayan beno. O dima derbazê Zapî beno û heta şehadetê xo Zap de têkoşîn keno. Embaz Rêber bi ruhê fedayîtî yê Apogîrî xo aver beno û pê kesayetê xo mîyanê îmkananê kêman de embazanê xo reyde vera dişmenî xo ver dano.
Embaz Serdem Qamişlo de dadîya xo ra beno û dima ke karê ciwanan kerdî tewrê gerîlayan beno. O taktîkê suîkastî de beno pispor û naye ser o derbazê Zapî beno. Embaz Serdem koyan de serkêşîya embazanê xo keno û Zap de kelayanê xoverdayîşî de derbanê giranan dano dişmenî ro.
Embaz Mazlum Nisêbîn de dadîya xo ra beno û 2015 de Mêrdîn de tewrê gerîlayan beno. O cade derbazê Zapî beno û tîya de beno kadroyanê tecrubeyînan ra yew. 7 serran o Zap de bi fedakarî şer xebatan keno û verê hêrişanê dişmenî gêno. O vera hêrişanê dişmenî qetî kesayetê xo ra tawîzan nêdano.
Embaz Erdal Kobanê de dadîya xo ra beno û Şorişê Rojawanî ra dima zî tewrê gerîlayan beno. O warê Zapî de wezîfe keno û wextêkê kilmî de bi marîfetanê xo beno fermandar. Embaz Erdal Hemleya Bazanê Zagrosî de bi aktîfî cagêno û serkêşîya çalakîyanê serkewteyan keno. O bi layîqî erkanê xo yê milîtanîye ano ca.” BEHDÎNAN
