Heyetê Rayberdişê Merkezî (MYK) yê HDPyî derheqê şuxilnayîşê çekanê kîmyewîyan de eşkerayîyêke daye.
Eşkerayîye de wina ame vatene: “Îdîa û delîlê cidîyî est ê ke Tirkîya operasyonanê vera Iraqî û Herêma Kurdîstanî çekê kîmyewîyî şuxilnayê. Bi dîmenanê ke medyaya dîjîtale de weşanîyayê na îdîa ameye raştkerdene. 2021 ra nata ge ge xeberê şuxilnayîşê çekanê kîmyewîyan kewenê rojdem. Îdîayî vanê ke Tirkîya goreyê peymana mîyanneteweyîye tênêgêrena. No çi beno sebeb ke şarê herême rê berê qirkerdişan abibo.
Ma reyna îfade kenê ke şuxilnayîşê çekanê kîmyewîyan goreyê Konvansîyonê Cenevre sûcê şerî yo û vera merdimîye yo. Ma venga rayaumûmîya demokratîke danê ke vera nê kerdişan vengê xo veja. Nê israrê şerî yê îqtîdarê AKP-MHPyî welat de krîzan virazeno. Sere de OPCW û Neteweyê Yewbîyayeyî ma venga pêro dezgehanê mîyanneteweyîyan û rayaumûmîye danê ke bi hawayêkê bitesîrê bixebitê.
Ganî Îdareyê Herêma Kurdîstanî zî derheqê nê îdîayan de cigêrayîşêkê cidîyî bikero. Ganî cade derheqê ê kesanê ke çekanê kîmyewîyan şuxilnenê, peyda kenê û sewq kenê de tehqîqat bêro akerdene. Ma sey HDPyî reyna wazenê ke meseleya kurdan bi metodanê şerî nêra çareserkerdene. Seba çareserîye tek rayîr dîyalog û pêvînayîş ê.” ANQARA
