Rêxistina Yewîya Doktoranê Mîyannteweyîye ya Vera Şerê Atomî / Doktorê ke Berpirsîyarîya Komelkî Kirişenî (IPPNW) mabênê tarîxanê 20-27ê êlula 20226î yew heyet şawitbi Başûrê Kurdîstanî û derheqê zîyaretî de raporêk weşana. Rapor de dîya zanayene ke delîlê xurtî est ê vanê ke dewleta tirke Başûr de çekê kîmyewîyî şuxilnayê.
Amadekeranê raporî ra Dr. Jan van Akenî derheqê babete de Çira TVyî rê qisey kerd. Akenî da zanayene ke PDKyî nêverdayo heyetê înan şoro Amedîyê coka înan dîmen û belgeyanê ke resaybî destê înan ser o cigêrayîş kerd û tay rêxistinan û selahîyetdaran de zî pêvînayîşî kerdî.
Akenî vat: ”Ez pê bawer a ke eke hêrişê kîmyewî yê dewleta tirke bêrê eşkerakerdene no do bibo skandal coka Îdareyê Hewlêrî nêwaşt ke waranê hêrişî de cigêrayîş bêro kerdene. Ma delîlî xora dîyî la ganî heyetêko xoser o mîyanneteweyî herême de cigêrayîş bikero. Eke hukmatê Iraqî muracat bikero OPCW neçare yo ke şoro cigêrayîş bikero.”
Dr. Jan van Akenî vist vîrî ke Wezîrê Pawitişê Neteweyî yê Tirkîya Hulusî Akarî par Meclîsê Tirkîya de eşkera kerdo ke înan operasyonê vera Garê de gazê çimvêşnayîşî şuxilnayo û no qiseykerdiş zî yew îsbat o. Akenî pare kerd ke ê sey IPPNWyî wazenê reyna şorê herême û cigêrayîşan bikerê.
