Hemsereka Konseya Rayberdişî ya KCKyî Besê Hozat programêkê taybetî yê Medya Haber TVyî de rojemeê ercna. Qiseykerdişê Hozate ra tay nuqtayê muhîmî wina yê:
“24 serrî yo Îmrali de tecrîd, zext û îşkence est o. Ez sere de xoverdayîşê biheybetî yê Rayber Apoyî selam kena. Ewropa sey tim polîtîkaya dirî rayra bena. Nê caardişê tecrîdî mîyan de CPT, Yewîya Ewropa û Mehkmeya Heqanê Mediman ê Ewropa zî est a. Ê derheqê qewimîyayîşanê Îraliyî de her çî zanê. Bi zo berpirsîyarê Îraliyî yê. Îmrali sîstemêko mîyannetweyî yo. No sîtem hetê Almanya, Amerka û Îngîlîstanî ra ame ronayene. Rayberîya ma hetê Amerîka, Îngîlîstan û Mosadî ra ame tepiştene teslîmê Tirkîya bi. Tirkya wezîfeyê gardîyanîye kena. Şexsê Îmraliyî de komelê kurdan û tirkan binê îşkenceyî de yo. Ganî vera tecrîdî ma têkoşînê xurtî bikerê. Çarçeweya “Dem dema azadiyê ye” de di serrî ra zafêr o têkoşîno xurt ame dayene. Nika têkoşînê gerîlayan dewam keno. Şarê ma zî xover dano la no qîm nêkeno. No têkoşîn ge ge yeno birnayene. Ganî komelê Tirkîya û hêzê demokrasîyî zî wayîrê Rayber Apoyî bivejîyê. Têkoşînê Rayber Apoyî têkoşînêko heqdar o, ganî her kes tewrê nê têkoşînî bibo.
Her kes bêveng qirkerdişê vera kurdan seyr keno
Gerîlayî 6 aşmî yo têkoşînê bêhempa danê. Şerêko xidar est o. Dewleta tirke ya faşsîte qet huqûqêkê mîyanneteweyî nas nêkana. Dewleta tirke mîyanê Konseya Ewropa de ca gena û endama Yewbîyayeyanê Neteweyan a. Dewleta tirke morê xo dayo binê xeylêk pêkerdişanê mîyanneteweyî ro la pêkerdişan binpay kena û çekanê kîmyewîyan şuxulnena. Vengê Ewropa nêvejîyeno. Dewleta tirke sûcê şerî kena la qet çewî ra vengê nêvejîyeno. Her kes goreyê mefeatê xo têgêreno. Verê çimanê dinya de domanê kurdan sey grûpan pê çekanê kîmyewîyan şehîd benê. Hende done, îspat, dîmenî est ê. Belgeyê şuxulnayîşê her gazî est ê. Nê belgeyî ameye berdene OPCW zî. Qaçîko nê vera çekanê kîmyewîyan têgêrenê. La qet çewî ra veng nêvejîyeno û çew tewir nêgeno. Her kes bêveng qirkerdişê vera kurdan seyr keno. Yew hetî ra tewrê nê qirkerdişî beno. Bi xo sûcê şerî kenê. Coka ganî şarê ma vera nê hêrişan û bêvengîye qiyamet biqerfino.
Meseleya kurdan hinda merhaleya peyêne de ya
Êyê ke nê hêrişan de ameyî şehîd kerdene ewladê tewr ercîyayeyî yê şarê kurdî yê. Ewladê nê şarî semedê azadîya şarî, statuyê sîyasîyî, Kurdistanê azadî ganê xo danê. Vera nê hêrişan bêveng memanê, eyb o. Hinda têkoşîn ameyo merhaleya serpilikî. Meseleya kurdan hinda merhaleya peyêne de ya. Na mesele ya bi rayîrê demokratîkî yena çaresekerdene, yan zî yena çareserkerdene. No şar seserra 21. de do bireso statuyê sîyasîyî. Eke wina nêbo bi seserran polîtîkaya qirkerdişî do bêro rayraberdene. Kurdî nêmanenê. Kurdan qedînenê. Tehluke tîya de yo. Dewleta tirke vana ma do 29ê teşrîna verên a 2023 de nê gureyî biqedînê. Soylu tim tarîx dano. Na polîtîkaya dewleta tirke ya. Serrgêra 100. a komare û Lozanî de wazenê PKKyî binate ra wedarê, kurdan qir bikerê û sîstemê xo yê faşîstî înşa bikerê. Coka muhîm o, ganî vera na polîtîka têkoşîn bêro xurtêrkerdene.
PDK hêrişanê kîmyewîyan keno meşrû
Rojawna de şar tim payan ser o, Ewropa de şarê ma tim payan ser o, Vakur de ye yew têkoşîn est o, Rojhelat zî wina, Başûr de şar vera polîtîkaya qirkerdişî hêrsbîyayeye yo la no nêaçarîyeno têkoşînê komelkîyî. Eke wina bibo no do welatanê dinya yê ke destûrê nê qirkerdişî dayo ser zaf tesîr bikero. No dewleta tirke zafêr teşhîr keno û îqtîdarî dano war. Yew linga nê hêrişî zî PDK yo. Eke PDK hêrişanê qirkerdişî yê Tirkîya meşrû mekero a çirey cesaretê hêrişanê winayênan nêkena. Xeta xayîne her qeyde îmkanan dana dewleta tirke. PDK hêrişanê kîmyewîyan keno meşrû. Yew sebebê bêvengîya hêzanê mîyanneteweyî zî no yo. PDK dewleta tirke rê rayîr virazeno, erzaq,cephane û leşkeranê ci kirişeno, birîndaranê ci kireşeno, tedawî keno, kincanê xo dano ci, Cayo ke leşkerê tirke nêeşeknê bikewê de wina kewnê de. PDK hemkara hêrişanê qirkerdişî yo. PDKyî dest na maskeyan ser û destur nêda heyetê Ewropa cigêrayîşê çekanê kîmyewîyan bikero. PDK û keyeyê Barzanî pê paştdayîşê Tirkîya keno ke îqtîdarê xo payre tepişo. Ganî şarê ma vera nê zî vejîyo û hêrsê xo bîyaro ziwan. Nêrazîbîyayîş est o la no qîm nêkeno.
Xeta Bêrîtane de do miheqeq têkoşîn ser bikewo
Embaze Bêrîtane 25ê teşrîna verên a 1992yî de şerê qirkerdişî yê yo ke dewleta tirke û PDKyî vera gerîlayan rayraberdene de bi xoverdayîşî şehîde bîye. Xora hîkayeya ci şarê ma zano. Seba ke birîndar destê PDKyî yê hemkar-xayînî mekewo, teslîm mebo xo kaşî ra eşt war. No erdemêko pîl o, xetêka têkoşînî ya. Naye ser o artêşbîyayîşê cinîyan ame ca. Artêşbîyayîşê cinîyan karekter û nasnameyê xo xoverdayoxîya Bêrîtane ra girewt. Ewro Zap, Avaşîn, Metîna û heme Kurdistanî de gerîlayî pê mîrasê embaze Bêrîtane têkoşînê biheybetî kenê. Ewro zî sey 92 dewleta tirke û hêzê hemkar-xayînî vera ma şer kenê û inkey zî gerîla bi eynî tewirî cewab dano. Gerîlayî teslîm nêbenê, sareberz şinê dişmenî ser. No tewirêko fedayîyo û çew nêeşkeno nê wirdi bivîno. Xeta Bêrîtane de do miheqeq têkoşîn ser bikewo.
Îqtîdar pê qalkerdişî nê pê têkoşînî yeno wardayene
Tirkîya de do vîjnayîşo tewr muhîm ê tarîxê ci bêro kerdene. Îqtîdar seba ke sûcanê şerî ra mero muhakemekerdene wazeno îqtîdarê xo bido domnayene û semedê nê çîyo ke destê ci ra yeno, keno. Tirkîya de faşîzm, zext şîdet est o. Her roje karker û kedkarî yenê qetilkerdene. Tirkîya de qirkerdişo ekonomoîk û ekolojîk est o. Kurdistan de no dilab yeno kerdene. Kurdistan de qirkerdiş est o. Reyna vera cinîyan qirkerdiş est o. Bi qala kilme îqtîdar Tirkîya rijnaya. Kurdistan de kurdî AKPyî ra qerfîyayî. Tirkîya de zî reyan vînî keno. Muxalefet xora eke qala kurdan bîyî hewt payan dano îqtîdarî ro. Eşkerayo ke sey îqtîdarî no muxalefet zî nêeşekno derdanê welatî rê bibo çare. Têna Rayber Apo eşkeno problemanê welatî bikero safî. Îtîfaqê Kede û Azadîye yo ke sîyasetê demokratîkî rayra beno eşeno xo bikero hêzê çareserîya bingeyîye. Potansîyelê nê îtîfaqî gird o. Îtfaqê Azadîye û Demokrasîyî ganî pê 5-6 partîyan sînordar memano. Nê biaçarnê îtîfaqê pêro komelî. Nê komelî de hêz est o ke nê îqtîdarê faşîstî birijno. Komel hêrsbîyaye yo. muxalefeto pîl vejîyayo werte. Eke nê komelî rê serkêşya raşte bêro kerdene, no îqîtdar nêameno. Îqtîdarê AKP-MHPyî seba ke îqtîdarî ra mero war şerê zereyî zî tede her çî geno çim. Xeylêk çete û kontrayî kerdî weyê, bi serran o girewtî binê kontrolê xo. Îmkanê ekonomîkî nê welatê destê nê îqtîdarî de yê. Coka her çî keno. Îqtîdar pê qalkerdişî nê pê têkoşînî yeno wardayene.” BEHDÎNAN
