Taxa Tece ya Mezîtlî ya Mersînî de hemverê Keyeyê Polîsan yê Teceyî de 26ê êlule de çalakîye kerde. Çalakîye de polîsêk merd û xeylê zî birîndar bibî. Endamê YJA STARe Dîlara Urper (Sara Tolhildan) û Emek Feremez Hisên (Ruken Zelal) ke na çalakîye pê ardbî, cayê hedîseyî de dinyaya xo bedelnayî. Hukmatê tirkî bi hemkarîya Partîya Demokratîke ya Kurdistanî (PDK) 17ê Nîsane ra nata herêmanê Zap, Metîna û Avaşînî de hêriş dabî destpêkerdiş û hêrişanê heta nika de xeylê reyan çekanê kîmyewîyan şixulna. Eşkerayîya HPGyî de ame vatiş ke Sara û Rukene hemverê şixulnayîşê çekanê kîmyewîyan û qetilkerdişê zîndanan na çalakîye kerdê.
Kesa ke sere de xo resna embazanê xo yê ke pê çekanê kîmyewîyan ra tesîr bîyê
Xebera ke Ajansê Xeberan yê Firatî (ANF) de ameye weşanayîş de ame dîyarkerdiş ke hedîseya ke Saraye ser de tewr zêde tesîr viraşt, hêrişê Sîyanê yê Garê bê. Xebere de ame vatiş ke Saraye kesa yewine bî ke xo resyane embazanê xo yê ke pê çekanê kîmyewîyan dinyaya xo bedelnayî û şahidîya qewimîyayîşî kerda û coka ra hemverê nê hêrişan de çalakî kerda.
‘Çi rihêko ercîyaye’
Saraye dejê embazanê xo rojnuşteyê xo de wina nuşta: “Ez nika fikirîyena acaba embazê mi yê şikefte de senî bîyê, senî 4 rojan nê gazî de, senî hemverê C-4î û her tewir hêrişan de xover dayê? Çi rihêko ercîyaye, çi rihêko pîl! Ma yê ke ganî xo biresnayêne înan, ma xo nêresna. Vebalê ci zaf giran o, gelo ez do senî binê nê ra biwirza? Û ez do se bikera! Soz dana ke ez do rexnedayîşê xo bi zerrî ra bida. Tena wa ez şêra raşteyê pratîkî. Ez do bi vindertişê xo yê ke dişmenî qehr bikera do rexnedayîşê xo bida û kêm bibo zî do wijdanê mi rehet bibo.”
‘Sara her tim cîya bî’
Dayîke Pîro Urpera ke cenazaya Saraye mîyanê tewreyêk de teslîm girewte, qisey kerd û wina vat: “Vîdeoyê peynî yê Saraye de tesîrê kîmyewî estbî. 14 serrî yo ke mi ne vengê kênaya xo eşnawitbî û ne zî rîye aye dîbê. Mîyanê tutanê mi ra Saraye her tim cîya bî. Qet zerrîya mi nêdejna. Şîyêne kar û wexto ke ameyêne zî hetkarîya mi kerdêne. Qet mi peygoş nêkerdêne. Cîranêke ma ya ke cinî ya bêkese estbî. Cayê karî ra pere arêdayêne û ardêne dayêne aye. Hemverê neheqîye de her tim sere wedaritêne. Kênaya mi xeylê narîn û hîsgêre bî.”
‘Girêdayeyê têkoşînî bî’
Pîroze dewamê qiseykerdişê xo de wina vat: “Sara hema emrê şenikatîye ra girêdayeyê têkoşînê azadîye yê kurdan bî. Ma wazenê tutê ma zî sey tutanê dinya, bi ziwanê xo qisey bikerê û nasnameyê înan bibo. Ma wazenê ke tepişteyî bêrê veradayiş. La hemverê qiseykerdişanê ma yê aştîye, ma erzenê zîndanan. Ez sey dayîkêke nêwazena leşker û polîsî zî bimirê. Wa gerîla nêmiro. Ez wazena tutê ma herra xo ser de azad bicuyî. La dewlete nêwazena. Ma wazenê bi nasnameyê xo bicuyê.”
‘Hemverê şixulnayîşê çekanê kîmyewîyan de na çalakîye kerde’
Pîroze tewr peynî veng daye şarê kurdî û vengê çekronayîşê qorîcîyan kerd û wina domnaye: “Saraye cuya xo de qet neheqî qebul nêkerdêne. 12 embazê aye bi çekanê kîmyewîyan ameyî qetilkerdiş. Kênaya mi bî şahidê ci. Aye zî tesîrê şixulnayîşê çekanê kîmyewîyan de mende. Tabutê ke zîndanan ra vejîyayî û çeke kîmyewîyan dî. Coka ra na çalakîye pê arde. Ez paştî nêdana şerî. La wa qesebaya kesêk nêvêşa. Wa sereyê şarê kurdî weş bibo.”
Kênaya xo rê şîîrêk nuşte
Pîroze peynîya qiseykerdişê xo de şîîra ke seba kênaya xo Saraye nuşta wende. Pîroza ke dejê xo heriknaye şîîre, hesreta seba kênaya xo û girewtişê cenazaya aye ke tewreyêk de dîyaye aye vana.
Şîîra ke Pîroze seba kênaya xo nuşta wina ya:
“Dêya min pir bêriya te kiribû
Ez pir tehni bûm diçim ser kaniyê
Le av tê de tune ye, ez bi aliyê çem de herikiyam
Lê şûna avê, ne av xwîn diherikiya
Şev û roj av têra xwe, av têra xwe dide
Mezitli ez diçûm delala dilê xwe
Pêşvaz dikim lê delala dilê min pirtik û poşet in
Min digot qey ez ê rûyê delala xwe ramûsim
Lê min di destê xwe de pirtik û poşet didît
Ez çi bibêjim ez çi bikim lê tenê dibêjim oxir be.” STENBOL
