Koordînasyona Kongra Star a Rojava bi boneya 1ʹê mijdarê daxuyaniya nivîskî weşand.
Kongra Star bi vê boneyê şehîd Arîn Mîrkan û Rêvana bi bîr anîn û got, di şexsê Arîn Mîrkan û Rêvana de berxwedan jin îro bûye semboleke navdewletî.
Daxuyaniya Koordînasyona Kongra Star a Rojava wiha ye:
ʹʹÇeteyên DAIŞʹê sala 2014ʹan ji bo tunekirina destkeftiyên gelê kurd û gelên herêmê bi piştgiriya dewleta tirk bi tang û topên xwe êrîşî Kobanê kir. Serokê dewleta tirk digot Kobanê ket û wê bikeve ji bîr kiribû ku gelê Kobanê xwe bi fikir û ramanên azad yên Rêberê PKK’ ê Abdullah Ocalan perwerde kiriye.
Gelê Kobanê û şervanên azad 133 rojan li dijî hovîtiya DAIŞʹê li ber xwe dan, têkoşiyan û mohra xwe li serdema 21ʹ emîn xist. Ruhê piştevaniya gelê azadîxwaz û şervanên YPG û YPJʹê û îsrara di têkoşînê de her wiha rola berxwedan sembolîk Arîn Mîrkan û Rêvana ya rihê xwedawendên Îştar û Înana zindî kirin.
Arîn Mîrkan û Rêvana li hember hişmendiyên paşverû, destdirêjî, tundî, revandin û kolekirina jin teslîmiyet red kir û bi çalakiya xwe ya fedayî navê berxwedana Kobanê kir berxwedana jina azad û di şexsê Arîn Mîrkan û Rêvana de berxwedana jin îro bûye semboleke navdewletî. Berxwedana Kobanê ya ku bi serkêşiya YPGê û YPJê bi pêş ket bû raperîna wijdana hemû gelên cîhanê. Ji lewre jî li seranserî cîhanê piştevanî bi gelê kurd û Kobanêre bi pêş xist û bû sedema hevpeymanên bi Koalisyona Navneteweyî re li dijî DAIŞʹê. Ev hevpeyman kete xizmeta mirovahiyê û DAIŞ hate tunekirin.
Lê belê vê carê dewleta tirk xwest tola tunekirina û binkeftina DAIŞʹê hilîne û rûyê xwe yê rast aşkere kir û bi hemû rengên sîlahên qedexekirî û kîmyesal êrîşî Efrîn, Serêkaniyê û Girê Spî kir û dagir kir û hemû kiryarên dijmirovî û dijexlaqî li herêmên dagirkirî pêk tîne. Ji bo vê yekê divê helwesteke tund li dijî dagirkeriya dewleta tirk ya ku destekê dide DAIŞʹê bê girtin û pêşî li xetereya li ser mirovahiyê bê girtin, ji ber ku DAIŞ li herêmên Bakur û Rojhilat û herêmên dagirkirî amadekariya êrîşeke berfireh dike û xwe nû dike.
Banga me ji bo tevahîyê gelên azadîxwaz heye ku li hember dagirkeriya dewleta tirk a li ser herêmên Rojava ku bi rihê 1ʹê mijdarê Roja Cîhanê ya Piştevaniya Berxwedana Kobanê têbikoşin. Çawa ku hemû hêzên cîhanê li hember tarîtiya DAIŞʹê bûne yek û mirovahî ji vê xetereyê xilas kirin, pêwîst e îro jî ji bo rûmeta mirovahiya azad û ji bo tunekirina DAIŞʹê bi heman rihî xwedî li Kobanê û şoreşa gelên azadîxwaz derkevin û destekdayîn bi hêzên QSD, YPG û YPJʹê re bê dayîn ”
