Fermandarê Qerargehê Merkezê Pawitişê Şarî (MPŞ) Murat Karayilanî derheqê armancanê hêrişanê kîmyewîyan ê dewleta tirke, hewcekerdişê cewabê hêrişanê kîmyewîyan û mesuldarîyanê rayaumûmîye de ANFyî rê qisey kerd.
Qiseykerdişê Murat Karayilanî ra beşêk wina yo:
”Şeş mengan ra zêdeyêr o gerîlayî Zap, Avaşîn û Metîna de vera çekanê kîmyewîyan xo ver danê. Xeylêk embazê ma nê hêrişan de şehîd bîyî. Ma tewr peyên dîmenê şehadetê embaz Baz û Helbeste pare kerdî. Verî seba nê dîmenan ez keyeyan û dadîyanê embaz Baz û Helbeste ra uzrê xo wazena. Seba ke raştîya nê hêrişan eşkera biba ma neçare mendî ke nê dîmenî vila bikerê. Bêguman ma do axê nê embazanê xo erdî de meverdê, qesasê înan do bigêrê. Ez şexsê embazanê ma Baz û Helbeste de pêro şehîdanê ma yad kena.
A raşte Operasyonê vera Garê yê 2021î ra nata ma na babeta çekanê kîmyewîyan ardêne ziwan. La dewleta tirke nêverdayêne ke babete bêra rojdem. Wextê operasyonê Garê de zî Hulusî Akarî pê fekê xo vatbi ke înan gazê çimvêşnayîşî şuxilnayo ke no gaz zî qedexekerde yo. Wexto ke ma delîlê zelalî zî eşkera kerdî dewlete vat ke ‘no propagandaya PKKyî ya, dezenformasyon o.’ Dewlete bi psîkolojîya sûcdaran cade nê hêrişî red kerdî. Eke dewleta tirke hende pê xo bawer a wa heyetê xoserî şorê herême de cigêrayîşan bikerê. Xora ma zanenê ke dewleta tirke zûran kena. Ma sey Konseya Hemserekîya KCKyî reyna dibare kenê ke ma seba asayîş û cigêrayîşê heyetanê xoseran çi hewce keno do bikerê.
Seba ke Şebnem Korur Fîncanci vat ke ganî nê îdîayî bêrê cigêrayene ameye tepiştene. Dewlete bi nê tepiştişî waşt ke çimê her kesî bitersna. Erdoganî û mêrikanê ci cade Şebnem Xoca kerde hedef. Çunke ê nêwazenê zûrê înan eşkera bibê. Reyna rojnamegerê ke derheqê hêrişanê kîmyewîyan de xeberî viraştî ameyî tepiştene. Rejîmê AKP-MHPyî yo faşîst pê nê kerdişan nêeşkeno netîce bigêro. No tewirê înan do nêeşko verê hêrişanê kîmyewîyan bêro girewtene.
Rejîmê AKP-MHPyî seba ke weçînayîşan de ser bikewo şovenîzm keno, wina hêrişê gerîlayan keno û şerî keno giranêr. Erdogan, Bahçelî û Hulusî Akarî wina plan kerd ke Garê de pê çekanê kîmyewîyan cade ser bikewê û şorê weçînayîşê verwextî. La planê înan pûç bi. Dima înan pê çekanê kîmyewîyan hêrişê Zap, Metîna û Avaşînî kerd ke cade ser bikewê. La ha nika şeş mengî o şer dewam keno. Seba ke Erdogan newe ra bêro ser sîyasetê qirkerdişî yeno kerdene. Destek û bêvengîya dezgehanê sey OPCWyî û dewletanê mîyanneteweyîyan hêz danê hêrişanê kîmyewîyan ê dewleta tirke. Mumkîn nîyo ke nê dezgeh û dewletî nê hêrişan ra bêxeber bê.
Raşt o ke dewleta tirke Terteleyê Dêrsimî de zî verî zî çekê kîmyewîyî şuxilnayî. La nika rewşe cîya ya. Dewleta tirke seba ke bi temamî kurdan qir bikera, gerîlayan tasfîye bikera narey nê çekanê kîmyewîyan û bombayanê termobarîkan-nukleran hende bêperwa şuxilnena. Tedbîranê gerîlayan ra heta nika dewleta tirke nêeşkaye ser bikewa. Taktîk û terzê gerîlatîya dewrê neweyî eşkenê teknîk û tekonolojîya dewleta tirke bin bikerê, bişiknê. Ma bi erazî de vilakerdişê şerî, tîmanê hereketînan, şerê tunelan perspektîfê nê xoverdayîşî virazenê. Dewleta tirke zî vera ney wina plan kerd ke erazîyan de pê hêrişanê hewayî û tunelan de zî pê çekanê qedexekerdeyan û kîmyewîyan netîce bigêra. Hulusî Akar pêro dinya xapîneno, wina mojneno ke seke leşkerê înan singe bi singe şer kenê. La a raşte ê kenê ke pê çekanê kîmyewîyan ser bikewê. La înan xoverdayîşê gerîlayan, taktîk û terzê gerîlayan û wijdanê şarî hesab nêkerdî. Cinî û lajê kurdî hê koyan de pê felsefeya Rayber Apoyî û îradeyê xo şer kenê. Dişmen no hesab nêkerd.
Gerîlayî hê vera nê hêrişanê kîmyewîyan xo ver danê. Tayênê ke xo rê vanê kurdî vera gerîlayan hetê dewleta tirke de vindenê û benê hemkarê nê hêrişan. PDKyî verî zî dest nabi maskeyanê ke erşawîyabî gerîlayan.
Eşkerayî û vengdayîşê Fermandarîya Qerargehê Merkezî ya MPŞyî ra dima şarê ma tewirêko xurt mojna la no qîm nêkeno. Ma pê bawer ê ke şarê ma do hîna zaf vera hêrişanê kîmyewîyan têbigêro. No prosesêko normal nîyo. Ma hê şerê mendiş û mergî kenê. Gerîlayî kenê ke verê qirkerdişê kurdan bigêrê. Gerîlayî rîskanê pîlan gênê û xover danê. Coka wa şarê ma, dostê kurdan û demokrat–şorişgêrî zî mesuldarîyanê xo bikerê. Nê prosesî de şorişgêr, welatperwer, ciwan û cinîyê Kurdistanî wa hîna zaf têkoşîn bikerê û bi xurtî wayîrê gerîlayan vejîyê. Wa çew vera hêrişanê kîmyewîyan, tecrîdê serê Rayberîye bêveng nêmano. Zulmo ke vera Rayber Apo û gerîlayan yeno kerdene cayêkê bînî yê dinya de çin o. Coka ganî ma zî vera nê kerdişan erk û mesuldarîyanê xo bikerê.
Çalakîkerê fedayî yê Mersînî Sara Tolhildan Goyî û Rûkene Zelal bîyî sembolê xeta serkewtişî ya fedayîye. Nê embazê ma yê ercîyayeyî endamê Tabûra Bêmergan bîyî. Çalakîya înan çalakîyêka normale nêbîye. Înan waşt ke vera hêrişanê kîmyewîyan û îşkenceyê zîndanan cewabêk bidê. Çalakîya înan çalakîya hişyarkerdişî ya cidîye bîye. Tabûra Bêmerganê Apogîran tabûrêka bêters a. Çalakîya embaze Sara û Rûkene seba pêro merdimîye mesajêko pîl û vera kerdişanê barbaran ê dewleta tirke qîrayîşê merdimîye bîye.” BEHDÎNAN
