Fermandaranê HPGyî ra Bêzar Semsûrî qala fermandaranê HPGyî ra Şehîd Bedreddîn Amanosî kerde ke 17ê teşrîna verêne ya 2020î de Amanos de şehîd bi.
Bêzar Semsûrî da zanayene ke ey 2007-2008 de Qendîl de Bedreddîn Amanos şinasnayo û vat: ”Embaz Bedreddîn wayîrê tewirêkê bidîsîplîn û qerardarî bi. Ey zaf wendêne, cigêrayîşî kerdêne û embazê xo zî perwerde kerdêne. Ey goş nayêne merdiman ser, analîzî kerdêne û her kesî rê ardim kerdêne. O Karamanî ra tirkêko yoruk bi. Dima ke PKK şinasna tewrê gerîlayan bi. Embaz Bedreddîn serê rêçê Hakî Karer û Kemal Pîrî de şi.
Embaz Bedreddîn hîrê reyî Amanos de amebi wezîfedarkerdene. Embazanê Amanosî tim qala embaz Bedreddînî kerdêne. Dişmenî şarî rê vatêne ‘Ma do Bedreddînî bikişê û Amanosî serûbin bikerê. Dişmenî key vengê ey eşnawitêne cade operasyonêk dayêne destpêkerdene. Coka ma ci rê cîhazê qiseykerdişî qedexe kerdbi. Embaz Bedreddîn tim pê têkoşînê xo dişmen bin kerd.
Embaz Bedreddîn zaf girîngîye dayêne qezençkerdişê merdiman ser. Ma ey reyde şorê kamca şarê uca (yorukê tirkî) ma rê vatêne ‘way dezayê ma, xalzayê ma ameyê.’ Rojêke ma şîyî cayêkî, uca de şiwaneyêko kokim est bi. Gijikê ci kewtbi pê. Embaz Bedreddînî ey rê pers kerd ke çira gijikê xo nêqesneno. Şiwaneyî vat ke îmkanê ci çin o. Raşta zî yorukê Amanosî xizan bîyî. Embaz Bedreddînî uca de embazan ra meqas girewt û gijikê ey qesna û sereyê ey şit. Şiwaneyo ke verî ey ra tersabi, dima verar şi embaz Bedreddînî û ci rê vat ‘Ti lajê min î, eke to rê çî mî lazim bo bê mi hetî.’ Şiwane û keyeyê ey tim hetkarîya ma kerde hînî.”
Bêzar Semsûrî ard ziwan ke şehadetê Bedreddîn Amanosî zaf tesîrê ey kerdo û vat: ”Embaz Bedreddîn kesêko enternasyonel bi. 1993 de o tewrê têgêrayîşî bibi. O wextêk Dêrsim de mend. Dima Amed de zî mend û derbazê warê Rayberîye bi. O tim bi layîqê Kemal Pîr û Hakî Karerî. Wayîrê mîrasê înan vejîya. Ma zî do têkoşînê embaz Bedreddînî rê dewam bikerê.”
* Bedreddîn Amanos (Îbrahîm Şengul) 17ê teşrîna verêne ya 2020î de wexto ke Fermandarîya Warê Amanosan kerdêne pa Aydin Amanos (Îsmaîl Erbay) şehîd bibi.
