Zîndanê Ereglî yê Konya de îşkence û kerdişê xirabî yê vera tepişteyan dewam kenê. Zîndan de 40 tepişteyî hucreyê yewkesî de tepişîyenê. Tepişteyî grevê vêşanîye kenê.
Seba ke waştişê înan nêameyî caardene tepişte Yakup Brukanliyî bedenê xo da adirî ver.
Tepişte Îbrahîm Sutcuyî pê telefonî keyeyê xo de qisey kerd û ard ziwan ke seba ke ey cigêrayîşo rût qebul nêkerdo ci rê cezaya qedexeyê têkilî û pêvînayîşî dîyaya. Sutcuyî da zanayene ke 23ê tebaxe ra nata ê hucreyê yewkesî de tepişîyayêne û vat: “Nika beno ke hûmara tepişteyanê grevê vêşanîye 40 ra zêdeyêr bîya. Ma hucreyê cîyayî de tepişîyenê. Hewagirewtişî ra ber aktîvîteyê bînî ma rê qedexe yê. Hetê hucreyanê ma de tepişteyê edlîyî manenê û ê tim ma aciz kenê. Ma grevî rê dewam kenê. Wexto ke ma waşt ke hucreyê hîrêkesî de bimanê îdareyê zîndanî ma rê qanûnê poşmanîye ferz kerd. Ma ra wazenê ke ma îxanet bikerê.”
Sutcuyî pare kerd ke Yakup Brukanliyo ke Rojhelatê Kurdistanî ra yo vera tecrîdê giranî bedenê xo dayo adirî ver û vat: “Rewşa ey giran a, ma tira xeberêke nêgênê. Ma do heta waştişê ma bêrê qebulkerdene grevê vêşanîye rê dewam bikerê.”
Sutcuyî vat ke ê wazenê Brukanliyî ra xebere bigêrê, heman koxûş de bimanê, saetê hewagirewtişî wa bizêdîyê, hetê koxûşanê tepişteyanê edlîyan de nêmanê û kerdişê xirabî wa biqedê.
Sutçuyî venga rêxistinanê heqanê merdiman, partîyan da ke wa zîndanî zîyaret bikerê. KONYA
