9’emîn Dadgeha Cezayê Giran a Amedê di 17’ê cotmehê de bi îdiaya ku di 3 axaftinên cuda de “propaganadaya rêxistinê kiriye” 11 sal û 7 meh û 15 roj cezayê girtîgehê li hevseroka Kongreya Civaka Demokratîk (KCD) Leyla Guven birîbû. Dadgehê biryara bisedem a cezayê girtîgehê yê li Guven birîbû, aşkere kir. Dadgehê di biryara bisedem a ji 46 rûpelan pêk tê de îdiakir ku axaftinên Leyla Guven ên di 6 çalakî û aktîvîteyan de “propagandaya rêxistinê” di nava xwe de dihewîne. Dadgehê di biryara bisedem de cih da rexneyên Leyla Guven ên li dijî operasyona leşkerî ya dewleta tirk a li dijî Bakur û Rojhilatê Sûriyeyê û diyar kir ku dewleta tirk rêxistinên li wir weke “rêxistina terorî” dibîne.
Cezakirin wekî pêdiviyeke civakî hat dîtin
Di biryara bi sedem de, ku tam nehat aşkera kirin ka Guven bi kîjan gotin an jî çalakiyan hat cezakirin, hat îdîakirin ku çalakî û xebatên Leylayê bi armanc û talîmatên PKK’ê, KCK’ê û YPG’ê re weke hev in. Di biryarê de Leylayê bi sûcê “endaman li rêxistinê zêde dike û hejmara alîgiran zêde dike” hate sûcdarkirin û hat gotin ku “Cezakirina Guven pêdiviyeke civakî ya lezgîn e”.
