Nîsana 2021î de dişmenî vera Avaşînî pê helîkopteran, teyarayanê şerî şerêko topyekûnî da destpêkerdene. Vera nê hêrişan gerîlayanê Avaşînî Mamreşo, Aris Faris, Girê Sor, Werxelê de xoverdayîşêko bêhempa da destpêkerdene. Gerîlayan mil bi milî vera nê hêrişan tunelanê şerî de destanî nuştî.
Nîsana 2022yî de zî dişmeno ke dersê xo Avaşîn de nêgirewto hêrişê Zapî kerd. 26ê temmuze de dişmeno ke Zap de bin kewtbi reyna verê xo da Avaşînî. Gerîlayanê Avaşînî pê tecrubeyanê xo yê tunelanê şerî derbê giranî dayî dişmenî ro û nêverda ke dişmen xo nêzdîyê şikefteyan bikero. Gerîla Devrîmî zî mîyanê gerîlayanê tunelanê şerî yê Avaşînî de cayê xo girewt.
Devrîm tunelanê şerî de wina qala israrê şerî yê gerîlayan kerdêne: “Çîyo ke ma par vatbi emser zî eynî yo: ‘Ê û ma çin ê, têna ma est ê.’ Dewleta tirke pê propaganda û metodanê gemarinan vera gerîlayan şer kerd, vat ke înan Avaşîn kerdo veng û xoverdayîşê Werxelê şiknayo. Înan vat qey eşkenê şikefteyan de ma bin bikerê la gerîlayan hesabê înan pûç kerd. Ma xoverdayîşê parî ra tecrubeyê pîlî vistî destî. Dişmen se keno wa bikero, hînî her çî rehet nîyo. Dişmen naye ra pey nêeşkeno hîna rehet bêro dekewo erdê ma.
Gerîlayî tîya de pê ruhê şehîdanê ma şer kenê. Armancê ma serkewtiş o. Raşt o; dişmen gazanê kîmyewîyan şuxilneno la bedelê înan do bibo. Dişmen game bierzo kamca ganî bizano ke ci rê 10 kesî do bikişîyê. Çunke ma sey gerîlayanê azadîye yê Kurdistanî do game bi game koyan, gelîyan, şikefteyanê xo de şer bikerê. Ma do wayîrê mîrasê têgêrayîşê ma, şehîdanê ma û embazanê ma vejîyê. Ma do nê erdê rûmetênî dewleta tirke rê meverdê.
Dewleta tirke seba ke krîz û kaosanê xo binimna vera ma şer kena. Ma verî vatêne ke heta çilka peyêne ya gonîya xo şer bikerê la nika gonîya ma ziwa biba zî, esteyê ma parçe bi parçe bibê zî ma do şer bikerê. Ma pêro embazan rê serkewtiş wazenê.” BEHDÎNAN
