Zîndanê Ereglî yê Konya de 40 tepişteyan 4ê teşrîna verêne de vera binpaykerdişanê heqan û kerdişanê xirabanê sey tecrîdî dest pê grevê vêşanîye kerdbî. Tepişte Yakup Brukanliyî 28ê teşrîna verêne de vera tecrîdê giranî bedenê xo dabi adirî ver. Goreyê agahîyanê ke avûkatanê Şubeyê Mersînî yê Komeleya Huqûqnasan a Seba Azadîye (OHD) dayê, Brukanli û 39 tepişteyê bînî hucreyê yewkesî de tepişîyenê.
Avûkatan da zanayene ke Brukanliyî 28ê teşrîna verêne de saete 10.00 de vera tecrîdî bedenê xo dayo adirî ver.
Avûkatan vat: ”Asta şewatî asta diyîne de ya. Mil nême ra vêşayo, engiştê wird destan vêşayê. Nêeşkeno milê xo bişuxilno. A roja ke ey xo vêşnabi, o reyna ameyo dekerdene bi hucreyî. Nika Brukanli û Osman Pînç heman oda de manenê. O nêwedarîyeno nêweşxane, revîr de yeno tedawîkerdene. Wexto ke benê revîr zî destê ci pey ra kelemçe kenê. Beno ke mîkrob bigêro.”
Avûkatan pare kerd ke cezaya dîsîplînî ra Brukanli nêeşkeno keyeyê xo bivîno.
