Fîlozof û ziwannas Noam Chomskyî kanalê Medyahaberî de cewab da persanê serê hêrişanê dewleta tirke ya îşxalkere.
Chomskyî vist vîrî ke dewleta tirke serranê 90an de bi des hezaran kurdî kiştî û nika zî pê çekanê kîmyewîyan kurdan rê qirkerdiş kena. Chomskyî vat: “Beno ke şuxilnayîşê çekanê kîmyewîyan îdîayêka raşt a. IPPNW rêxistinêka pêbawer a. Bêguman do başêr bibo ke herême rê heyetêko xoser bierşawîyo. Eke hukmatê neteweyîyî biwazê seba cigêrayîşî game bêra eştene.”
Chomskyî Îdareyê Herêma Kurdîstanî zî rexne kerd û vat: ”Ez pê bawer nêkena ke hukmatê herême tehqîqatêkê cidîyî biwazo.”
Prof. Dr. Chomskyî da zanayeke muamelaya vera Şebnem Korur Fîncanciye ra eşkera beno ke dewleta tirke çend zorbaz û otorîter a. Chomskyî waşt ke ganî tepişîyayîşê Fîncanciye hetê dewletanê Neteweyanê Yewbîyayeyan ra bêro protestokerdene.
Chomskyî bale ante ser ke sey Amerîka, Îngilîstan û Fransa zafê dewlete paştî danê hêrişanê dewleta tirke yê vera kurdan û vat: “Serranê 90an de zî dewleta tirke bi destekê Amerîka kurdî qir kerdî.”
Prof. Dr. Chomskyî peynîya qiseykerdişê xo de paştdayîşê xo yê bi Şebneme Korur Fîncanci û 9 rojnamegeranê kurdan ê tepişteyan ard ziwan û vat: “Ma do seba înan destî ra çi bêro do bikerê.”
