Konferansê Cinîyan o Mîyanneteweyî yo 2. o ke hetê Torra Cinîyî Ameyoxî Munenê ra amebi kerdene, paytextê Almanya Berlin de qedîya. Beşdaranê konferansê cinîyan ê Berlinî vat: “Armancê ma yew o.” Cinîyan seba dinyayêka newîye mesajî dayî.
Aktîvîsta haştîye ya amerîkayîje Genevieve Vaughan vat: ”Ez 50 serrî yo haştî û femînîzmî ser o xebitîyena, nuştox û aktîvîst a. Seba dinyayêka newîye atmosferêko winayên weş o. Dinyayêka cîya bi hêzkerdişê dinya, femînîzm û heskerdişê cuye bena. Ez nika verî ra hîna radîkal a çunke mîyanê nê têgêrayîşî de hêzê cinîyan hîna zaf hîs kena.”
Belûcistanî ra Sema Belûc vat: “Konferansî zaf tesîrê mi kerd, ez zaf çîyan musaya. Mi keyeyanê kurdan de têkilîyê neweyî nayî ro. Şoriş seba cinîyan o. Ma eşkenê her çî bivurnê û seba Kurdistan, Belûcîstan, welatanê îşxalkerdeyan ê bînan têkoşîn bikerê. Tîya de bîyayîş mi rê rûmet o.”
Violetta Gallardoya meksîkayîje vat: “Ez tîya de ya çunke eke ez seba heqanê xo têkoşîn nêkera nêeşkena seba cinîyan ê bînan têkoşîn bikera. Seba awankerdişê haştîye ma tîya de yê. Seba armancanê cîyayan ma eşkenê metodanê cîyayan bişuxilna. Ez zaf kêfweş a ke tîya de ya.”
Patricia Redzewskya almane vat: “Ez eslê xo de polonyayîj a. No atmosfer bêhempa yo. Fikrê cîyayî yenê ziwnan la armancê ma yew o. Ma her cayê dinya ra ameyî tîya û hewceyê ma bi azadîye est o. Ma eşkenê hêzê xo biresnê pê.’”
Anastasiaya ukraynayîje vat: “Ez pê kêfweş a ke tîya de tecrubeyê pîlî vistê destî. Xoverdayîşêko pîl est o. Ez xebatanê cinîyan ê kurdan rê zaf girîngîye dana. Konferans de her kesî hîs û fikrê xo pare kerdî. Ma nê konferansî ra zaf îstîfade kerd.”
Vervatoxa Koordînasyonê Paştdayîşê bi Şarê Mapuche yê Madridî Melida Molina vat: “Dewaya ma ya xoverdayîşî û yê kurdan manenê pê. Naye ra ez înan rê seba nê konferansî zaf sipas kena. Bi hêvîya ke têkoşîn de ma xo biresnê pê.”
Dadîya Şehîde Alina Sanchez Patricia Gordini vat: “Wexto ke ez seba definê cenaza şîya Şehba cinîyan û camêrdan pê kincanê pembeyan ez pêşwazî kerda. Uca de mi heskerdişê înan hîs kerd. Nê konferansî de ez pê hesîyaya ke kiştişê cinîyan têna kiştişê cinîyan nîyo.”
Semra Uzuok vat: “Ez boşnakanê Tirkîya ra ya, hîrê serrî yo surgun a. Seba xelisnayîşê welatî ma tîya de yê. Têkoşînê ma nika ra pey do bi hêzê nê konferansî dewam bikero û na seserre do biba seserra cinîyan.”
Vervatoxa Înîsîyatîfê Kurdistanî rê Haştîye, Ocalanî rê Azadîye ra Havîn Guneşere vat: “Ma nê konferansî de reyna dî ke hîkayeyê ma yew ê. Zaf girîng bi ke tîya de seba famkerdişê ney rayîr û metodê têkoşînê hemparî ser o nîqaşî ameyî kerdene. Konferansê ma asta tewr girînge de bi cewab.” BERLIN
