Tirkîya û Kurdistanî ra 775 huqûqnasan 10-17ê hezîrane de seba pêvînayîşê bi Rayberê Şarê Kurdî Abdullah Ocalanî muracatê Serdozgerîya Komare ya Bursa kerdbi. Dima zî 22 welatan ra 350 avûkatan 14ê êlule de, 14ê êlule de Rojawanî ra 691 avûkatan muracat kerdbî.
Komeleya Huqûqnasan a Seba Azadîye (OHD) bînaya xo ya Beyogluyî de avûkatanê welatanê cîyayan reyde kombîyayîşê çapemenîye kerd. Avûkato îtalyan Fabio Marcelly, Hetkarê Sekreterê Pêroyî yê Yewîya Avûkatanê Seba Heqanê Merdiman û Demokrasî ya Ewropa (ELDH) Thomas Schmidt, avûkatê Buroyê Huqûqî yê Asrinî û Hemsereka OHDyî Îlknure Alcan zî tede xeylêk avûkatî tewrê kombîyayîşî bîyî.
Hemsereka OHDyî Îlknure Alcan derheqê tecrîdê Îmraliyî de qisey kerd û vist vîrî ke 2011 ra nata Ocalanî reyde pêvînayîşî nênê kerdene. Alcane vat: “No hînî tecrîdêko mutleq o. Qasê 2 hezar avûkatan seba pêvînayîşê bi Ocalanî muracat kerd.”
Avûkatanê Buroyê Huqûqî yê Asrinî ra Îbrahîm Bîlmezî vat: “Zîndanê Îmraliyî mîyanê sîstemê Konseya Ewropa de yo la rixmê ney zî xebera ma pê rewşa nê zîndanî çin a. Dezgehê huqûqî yê Ewropa rewşa zîndanê Îmraliyî peygoş kenê. Tecrîdê Îmraliyî pêro merdiman eleqedar keno. Tecrîdê vera Ocalanî meseleya kurdan zî bêçare verdeno. Paştdayîşê avûkatan ma rê zaf girîng o. Seba ke tecrîd biqedo ganî no paştdayîş bêro pîlkerdene.”
Hetkarê Sekreterê Pêroyî yê ELDHyî Thomas Schmidtî da zanayene ke înan seba qedînayîşê tecrîdê Îmraliyî Wezîrîya Edaletî ya Tirkîya rê mektubêk nuşto û dima mektub wend. Mektub de yeno vatene ke 25ê adara 2021î pêvînayîşê telefonî ra nata Ocalanî ra xeberêke nêna girewtene û no zî beno sebebê qesawetî. Mektub de ame vîrvistene ke CPTyî 2019 de tesbît kerdbi ke Îmrali de tecrîd est o.
Schmidtî vat: “Heqê pêro tepişteyan est o ke keye û avûkatanê xo de pêvînayîş bikero. Tirkîya ganî goreyê peymananê ke îmza kerdbî têbigêra û tecrîdî wedarna. Ma seba ke Abdullah Ocalanî û tepişteyanê bînan ê Îmraliyî de pêvînayîş bêro kerdene muracat kerd. Ma hêvî kenê ke muracatê ma do bêro qebulkerdene.”
Schmidtî dima cewab da persanê rojnamegeran û îfade kerd ke şarê Ewropa tecrîdî ra hayîdar ê û paradîgmaya Abdullah Ocalanî hetê pêro şaranê dinya ra zanîyena.
