Endamê Komîteya Rayberdişî ya PKKyî Duran Kalkanî bi wesîleya serrgêra 45. ya ronîyayîşê PKKyî ANFyî rê qisey kerd.Qismê yewînî yê roportajê Kalkanî ra tay noqtayê girîngî wina yê:
“Ma hê serra 50. ya Rayberîye yê û dekewenê serra 45. ya partîye. Ewro gerîlayî serkêşîya xoverdayîşê Îmraliyî sere de Zap, Avaşîn û Metîna her cayê Kurdistanî de bi qehremanî xo ver danê. PKK têgêrayîşêkê cinî, ciwan û şaran o ke hetê Rayber Apoyî ra ronîyabi. Coka PKK têgêrayîşê Rayberîye û şehîdan o zî. PKKyî heta nika çi fînayo destî xêrê Rayberîye ra yo. Mi teşrîna verêne ya 1973yî de Rayber Apo şinasna. O çax dinya de pêlê şorişê ciwanan ê 68î est bi. Her ca de xoverdayîşê pîlî est bîyî. Rayber Apoyî sey ciwanêkî ê çaxan tim wendêne û cigêrayêne. Ey kerdêne şar û komelê kurdan fam bikero. Netîceya nê xîretanê ey de PKK ronîya. Rayber Apoyî vengîya rayberîya Kurdistanî kerde de.
Serranê 80an de Rayberîye vejîyaye teberê welatî. Ey kadro, şerwan, fermandarî perwerde kerdî. Serranê 90an de sosyalîzmo reel bin kewt. Rayber Apo kewt peyê cigêrayîşanê neweyan. 1ê êlula 1998î de ey adirbirnayîş îlan kerd. O çax hêzanê kapîtalîstan û serdestan bi komployî hêrişê ci kerd. Komployê 15ê Sibate ra dima rewşa Îmraliyî vejîyaye werte. Rayberîye bêmabên Îmrali de zî cigêrayîşî kerdî. Axir Rayber Apoyî paradîgmaya xo awan kerde û şorişêko fikrî yo pîl kerd. Ey bi nê hawayî rayîr mojna pêro şaran. Rayber Apoyî wextan û şertanê tewr zehmetan de tim wina serkêşîye û serekîye kerde û newe ra xo ard ca.
50 serrî verî yanî PKKyî ra ver nameyê kurdî û Kurdistanî qedexe bîyî, çin bîyî. PKKyî vat kurd û Kurdistanî est ê. PKKyî nasname, rûmet, îrade, hişmendîye, rêxistinîye dayî kurdan. Ewro xêrê PKKyî ra pêro dinya kurdan şinasnena. 50 serrî verî asîmîlasyon û qirkerdişo kulturel serdest bîyî. Têkoşînê PKKyî bingeyê xebatanê kultur û edebîyatî eşt. Gerîlayî 45 serrî yo bi xo destanê qehremanîye nusenê. Ewro Kurdistan de azadîya cinîyan û komelî reyde azadîya neteweyîye qewimîyena. Ez pê bawer a ke prosesê verê ma de xebatê kultur û hunerî do binî ra bizêdîyê. Şorişê Kurdistanî sey şorişêkê kulturî do morê xo bido xebatanê huner û edebîyatî.
Têkoşînê çekdarî ra nêbîyêne kurdî hende aver nêşîyayêne. Xoverdayîş û têkoşîno çekdar ê PKKyî xeta xoverdayîşî de yenê kerdene. Yanî têkoşînê ma yo çekdar têkoşînê pawitişî yo meşrû yo. Kurdistan de o çax binê ê şertan de cara têkoşîno çekdar mecbûrî bi. Netîceya têkoşînê gerîlayan ê çekdarî de serranê 90an de Kurdistan de sîyaseto demokratîk aver şi, xebatê ziwan, edebîyat û kulturî ameyî kerdene. Kurdistan de heta ke no sîstemo kolonyalîst bi şîdetî nêro şiknayene qet yew çi do nêro destvistene. Kolonyalîzmo faşîst ancax bi xoverdayîşê xopawitişî yeno şiknayene. Têkoşînê PKKyî yo çekdar nê esasî ser de, çarçewa xopawitişî de yeno kerdene.
Biewnê çalakîyê PKKyî yê çekdarî şehadetê Hakî Karer û Halîl Çavgunî ra dima bingeyê qesasî de dîyayî destpêkerdene. Hemleya 15ê Tebaxa 1984î vera zulmê Darbeya 12ê Êlule ameye kerdene. Ewro zî Zap, Metîna û Avaşîn de gerîlayî nê esasî ser o xo ver danê. Têkoşînê PKKyî yê çekdarî serdestîya dişmenî şiknaye, komelê kurdan hişyar kerd û çêrî, fedakarî, îrade dayî kurdan. PKKyî kurdî kerdî hêzêko rêxistinkerde û cinîyê kurdî zî perwerde û rêxistin kerdî.
50 serrî yo PKK û Rayber Apo tim bîyî pîlêr, aver şîyî. PKK hêzê caardişê şorişî, afernayîşê cuya azade, averberdişê cinîya azade û awankerdişê komelê demokratîkî yo. PKKyî heta nika verê merdimanê azadan, cinîya azade, komelê azadî, neteweya demokratîke û sîyasetê demokratîkî akerd. Ewro eşkera bi ke nê çîyî çend girîng ê.” BEHDÎNAN
