DFG û MKGP’ê xwestin şehîdxistina rojnamegerê ANHA’yê Îsam Ebdûlah protesto bikin lê ji aliyê polîsan ve hatin astengkirin.
Komeleya Rojnamegeran a Dîcle Firatê (DFG) û Palatforma Rojnamegerên Jin a Mezopotamyayê (MKGP), ji bo bîranîna nûçegihanê ANHA’yê yê Dêrikê Îsam Ebdulah ê ku di êrîşa hewayî ya dewleta tirk de şehîd ketibû, li ber avahiya DFG’ê bi beşdariya rojnamegeran xwestin daxuyaniyê bidin. Gelek rojnameger xwestin tev li daxuyaniyê bibin. Lê polîsan kolana Hunerê ku wê daxuyanî lê bihata dayîn kirin bin ablukayê. Her wiha rojnamegerên ku xwestin keşanê bikin pêşiya wan ji aliyê polîsan û wesayitên zirxî yên polîsan ve hat girtin.
‘Em vê biryarê şermezar dikin’
Polîsan qedexeya walitiyê wek hincet nişanda û destûr nedan ku rojnameger ji avahiyê derbikevin. Hevseroka DFG’ê Dîcle Muftuoglu jî cihê ku hatin astengkirin de ev tişt got: “Em di hindûr de daxuyaniyê nadin û em vê pêkanînê şermezar dikin. Lê bila bizanibin ku çapemeniya azad jî di bin tu şert û mercan de bêdeng namîne. Mafê rojnamegertiyê û yê ragihandinê nikare bê astengkirin Em jî vê biryarê protesto dikin.”
