Rêxistinê cinîyan ê kurd, elewî, sosyalîst û şorişgêran zî tede Platformê Paştdayîşê Cinîyan ê Londonî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan panelê bi nameyê ‘Serewedaritişê Cinîyan ê Îranî û Dersê ke Tira Bêrê Girewtene’ viraşt. Panel cemxane de ame kerdene û moderatorîya ci zî Sîbele Ozçelîk kerde. Nuştoxa sosyalîste Hatîce Guden û aktîvîsta Îranî Asoye Kawalî panel de qisey kerd.
Gudene qala ci kerde ke Şorişê Îslamî yê Îranî binvistişê Şah Pehlewî ra dima vurîya rejîmêkê otorîterî û vat: “Şorişê Îslamî yê Îranî destpêk de şorişê karkeran û çepgîran bi. La dima bi fermanê Humeynî qedexeyê vera cinîyan dîyayî destpêkerdene. Rejîmê Îranî û rejîmê AKP-MHPyî manenê pê.”
Hatîce Guden îfade kerd ke proseso nikayên ê Îranî berhemê xoverdayîşê serranê 2000î yo û vat: “Îran de cinîyan, ciwanan, karkeran û kurdan no proses vurna. Êyê ke serkêşîya nê prosesê şorişî kenê cinîyê kurd ê. Kokê bingeyî yê dînamîzmê şorişgêrî yê Îranî cinîyê kurdî yê. Eke sloganê ‘jin, jiyan, azadî’ bîyo slogano bingeyî yê têkoşînê Îranî no tesîr û hêzê têgêrayîşê xoverdayîşî yê kurdan mojneno.”
Aktîvîsta Îranî Asoye Kawalî zî derheqê xoverdayîş û netîceyanê ci de qisey kerd. Panel bi sloganê ‘jin, jiyan, azadî’ qedîya. LONDON
