Endamê Komîeya Rayberdişî ya PKKyî Duran Kalkanî ke Programê Taybetî yê Medya TVyî rê qisey kerd ercnayîşê muhîmî kerdî. Qiseykerdişê Kalkanî ra qismêk wina yo:
“Buroyê Huqûqî yê Asrinî eşkera kerd ke CPTyo ke şîyo Îmrali Rayber Apoyî reyde pêvînayîş nêkerdo. Na rewşêka zaf tehlukeyin a. CPT ganî cade eşkerayîye bido rewşe safî bikero û keyeyî û avûkatî yew hele cuwa ver şirê Îmrali. Her fekî ra yew çî vejîyeno. Vatişê cîya cîya est ê. Çîyo eşkera oyo ke derheqê Rayber Apo û hemrayê bînê ke Îmrali de zanayîşê zelal çîn o. Înan ra xebere çîna. Senî dezgeho sey CPT vano ma şîyî zîyaret kerd la eslê xo de çîyo winayên çîn o. Her kes rewşa Îmraliyî goreyê xo şuxulneno. Keyeyî û avûkatî nêeşkenê derheqê rewşa Rayber Apoyî de çîyêk vajê la ê bînî qisey kenê.
Meseleya kurdan meseleyêka giran a. Êyê ke wazenê na mesele çareser bikerê ganî sere de bi giranî nêzdîyê ci bibê. Kam ke goreyê menfeatê xo na mesele bigêro dest binê ci de do bimano. Wa çew xo mexapîno, meseleya kurdan têna pê Rayber Apoyî yena çareserkerdene.Rayber Apoyî ercnayîşê hîrayî kerdî, projeyê xo vatî. İnkey senî ke eseno reyna kay kaykenê ke no zaf tehlukeyin o. No her kesî vêşneno. Ganî her kes aqilê xo bigêro sereyê xo. Raştîya Îmraliyî heme maskeyê dayî war. Dezgehê Ewropa ke tim qala demokrasî, heq huqûqî kenê ma vînenê ê tena qale de est ê, pratîk de çîyêk nêkenê.
CPT vano ez şîya mi dî, o bîn vano nêdîyo. 20 aşmî yo Îmraliyî ra xeberêke çîn a. Coka problemê weşîye û asayîşî zaf giran ê. Ganî her kes vera na rewşe zaf hîsgêr bo. İnkey ma sey têgêrayîş û şarî, sey heme komelê kurdan, heme Tirkîyaya demokratîke, Rojhelatê Mîyanênî sey merdimîye berpirsîyarê rewşa Îmraliyî yê. Îmralîyî ra her kes berpirsîyar o.Îmrali her kesî eleqedar keno. Nabzê heme
merdimîye ûca erzeno. Na rewşe normalî ra wetêr a. Coka ganî seferberîye ra wetêr bêro têgêrayene.
Şarê ma, cinî, ciwanî hewtî ra heta hewtayî wa her kes wirzo payan ser. Heme kurdî çar parçeyan û tewberê welatî de ça beno wa bibo her kes na rewşe ra berpirsîyar o. Her kes ganî nê tehlukeyî fam bikero û vera ci vindero. Rewşa winayên de vindetiş, rakewtiş û roniştiş raşta zî herem o. Têna semedê kurdan nê kam ke xo ra vano ez şorişgêr, demokrat û sosyalîst a ganî vera na rewşe vindero. Pê maske û qale nêbeno. Kam çi yo, çi nîyo ewro bewlî beno. Rewşe zaf giran a. Ma sey têgêrayîş û şarî tarîxê têkoşînî xo de prosesêkê tewr awarte de yê. Coka ganî bi ruhê seferberîya çalakîyî bêrê domnayene. Semedê çalakîyan zaf eşkerayîye ameye dayene. Ganî nê vengdayîşî eşkerayîyan de memanê. Êyê ke heta inkey vejîyayî waran û wayîrê Rayber Apoyî vejîyayî ez înan selam kena û çalakîyan de serekwtiş wazena.
PKK bi hewayêkê biheybetî kewt serra 45ine. Hem zî Zap, Avaşîn û Metîna de gerîlayan serkewtişê girdî fînayî dest. Gerîlayan îşxal şikit û pê çalakîyanê girdan şino dişmenî ser. Xora HPG tim eşkera keno û dîmenê çalakîyan zî yenê weşanayene. Ganî şarê ma dahîna zaf wayîrê xoverdayîşê gerîlayan vejîyo, têkoşînêxo bî înan bikero yew û her warî de aver bêro. Bitaybetî cinî û ciwanî eşkenê na babete zafêr berpirsîyarîye bîgêrê. Eke şar û gerîla bi hewayêkê hemwextî pîya têkoşîn bikerê, ma eşkenê ser bikewê. Ganî barê her kesî serkewtişî de bibo. Ma demê krîtîkî ra ravêrene. Ganî her kes hîşyar bo. Êyê ke Tirkîya ra hes kenê wazenê tede azad biciwîyê wa bizanê ke no pê Rayber Apoyî mumkun o. Ganî her kes aqilê xo bîgêro sereyê xo. Pêra wa çew mevejo ax wax. Ganî îqtîdarê AKP-MHPyî ra bêro xelisnayene. Wa çew hesabo xelet mekero. Têna Rayber Apo eşkeno mesele çareser bikero. Kam ke demokrasî û azadîye wazeno wa Rayber Apoyî rê raşt nêzdî bibo.” BEHDÎNAN
