Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de sere de tecrîdê vera Rayberê Şarê Kurdî Abdullah Ocalanî rojdem ercna.
Qiseykerdişê Karayilanî ra tay noqtayê girîngî wina yê:
“21 mengî yo ma nêeşkenê Rayber Apoyî ra xebere bigêrê. Agahîyê ke dîyenê qîm nêkenê û xora agahîyêka fermîye zî nêdîyena. Na rewşe zî qesawetê ma zêdînena. CPTyî verî vat ke ma ‘Îmrali de pêvînayîş kerd’ la dima eşnawîya ke Rayber Apoyî pêvînayîşê bi CPTyî red kerdo. Eke wina nîyo çira CPT verê zûran nêgêno? Yanî şik û gumanê ma zêdîyenê. Her kes zaneno ke Raybr Apo seba şarê ma, têgêrayîşê ma û dostanê ma zaf girîng o, stratejîk o. Coka wa her kes bi na hişmendî nêzdîyê ci bibo.
Rayber Apo mabênê şarê kurdî û şarê tirkî de pirdêk o. Ganî her çî ra ver selahîyetderê dewleta tirke ney bivînê û bizanê. Ganî bi hesabanê qijan têmegerê, şaşîyan mekerê; no tehlukeyêko pîl o.’ Vakurê Kurdistanî de teror, Rojawan de dewleta tirke îşxal kena. Bingeyê nê kerdişan de zî tecrîdê Îmraliyî est o. No sîyasetê înkar û qirkerdişî yo. Ganî hêzê mîyanneteweyî nêbê hemparê nê sîyasetî. CPT dezgehêkê Konseya Ewropa yo. Ma venga Konseya Ewropa, Amerîka danê ke xeta xo ya sîyasetê komployî ya vera kurdan bivurnê. Hînî ma de sebr nêmendo.
Na rewşêka cidî ya û şarê ma ho yew îmtîhan de yo. Ganî ma nê prosesî de wayîrê Rayber Apoyî vejîyê, bi mesuldarî têbigêrê. Ganî ma hîna zaf xo rêxistin bikerê, vera sextekarî, dirîtî û neheqîye bixebitê. Wayîrvejîyayîşê Rayber Apoyî wayîrvejîyayîşê xo yo, wayîrvejîyayîşê têkoşînê xo, nasnameyê xo yo. Sere de şarê ma yê Ewropa ma venga pêro şarê xo danê ke 8 mengî yo gerîlayî şewe û roje çeperan de yê, nêeşkenê rîyê xo zî bişuwê, binê hêrişanê kîmyewîyan de yê. Wa şarê ma bizano ke ewro ciwanê ma, şorişgêrê ma û Rayberê ma binê barêka girane de yê. Ganî ma bara Rayberê xo sivik bikerê. Şarê ma yê Ewropa wa hîna zaf vejîyo meydanan. Rojawan û Rojhelatê Kurdistanî de şarê ma cara ho meydanan de yo. Ganî Vakurê Kurdistanî de zî şarê ma vejîyo waran.
Dewleta tirke wazena Îdareyê Xoserî yê Rojawanê Kurdistanî çin bikera. Îqtîdarê AKP-MHPyî wazeno bi nê şerî şoro weçînayîşan û ser bikewo. Îqtîdar seba ke nêeşka Herêmanê Pawitişî yê Medya de xo rê hîkayeyêka serkewtişî bivisno destî verê xo da Rojawanî. Dewleta tirke wazena Rojawanî ra kurdan veja û her cayê Rojawanî bikera sey Efrînî. Dewleta tirke wazena nê cayan de cerganê El Nûsra û DAÎŞî cabikera.
Nê hêrişê vera Rojawanî sîyasetê vera pêro kurdan o. Eke dewleta tirke Rojawan de ser bikewa serê erdî de kurdêk do nêverda. Coka ganî ma Rojawanî teyna meverdê. Ganî welatperwerî bibê yew, paştî bidê xoverdayîşê Rojawanê Kurdistanî.
Dewleta tirke 2 serrî yo bêmabên hêrişê gerîlayan kena la nêeşkena ser bikewa. Gerîlayî seba şarê kurdî bîyî manaya biîradebîyayîşî. Destkewteyê ma yê tewr pîlî nê yê ke metod û taktîkê ma ser kewtê. No tecrubeyêko pîl o ke bi xoverdayîşê qehremananê ma ameyo afernayene. Avaşîn, Zap û Metîna de ame dîyene ke ma eşkenê erdê xo bipawê. Eke şarê ma yê Rojawanî zî esasê Şerê Şarî yê Şorişgêrî de, bi tecrubeyanê şerê gerîlayan têkoşîn bikero do bieşko ser bikewo. Tîya de oyo muhîm no yo ke wa şarê ma bi hêz û îradeyê xo bawer bibo.
Tay kesî persenê ke ‘Gelo dewleta tirke serê erdî ra hêrişê Rojawanî do bikera?’ Dewleta tirke cara nêweşxane, dibistan, binawanî û dezgehê şarê ma dana bombayan ver. Çi ferq keno? Dewleta tirke wazena dima ke kurdan Rojawanî ra veja Sûrîye de bina serwer. Şarê ma heta nika koç nêkerd. Eke dewleta tirke serê erdî ra zî hêriş bikera ma pê bawer ê ke şarê ma do koç nêkero. Eke şarê ma îradeyêkê xurtî bimojno dewleta tirke do nêeşka aver şora. Ganî na babete (hêrişê serê erdî) de dîplomasîyêka xurte zî bêra kerdene.
Ganî Îdareyo Xoser bieşko wayîrê îradeyî bibo û pawitişê xo bikero. Ganî Îdareyo Xoser xo bikero îradeyêk. O çax Sûrîye zî, Amerîka zî, Rûsya zî do ey qebul bikero, bişinaso. Xoverdayîş de cuya azade est a. Nê esasî ser o ma pê bawer ê ke şarê ma do xo ver bido û ser bikewo. Nika ra ma şarê Rojawanî rê serkewtiş wazenê.” BEHDÎNAN
