Ronayoxê Weqfê Hîranurî yo ke pabeseyê Cemaatê Îsmaîlogluyî yo, Yusuf Zîya Gumuşluyî kênaya xo H.K.G.ye ya 6 serrî binê nameyê ‘zewajî’ de da murîdê xo Kadîr Îsteklîyî û H.K.G.ye bi serran raştê tecawuz û îstîsmarî yê sîstematîk ameye. Bado ke rewşe vejîya raşte derheqê Yusuf Zîya Gumuşlu û Kadîr Îsteklîyî de îdîaname ame hadrekerdiş.
Îdîaname
Îdîaname 9ê kanûne de hetê mehkemaye ra ame qebulkerdiş. Dima ra derheqê Yusuf Zîya Gumuşlu û dayîka H.K.G.ye Fatma Gumuşluye de sucê ‘bi hawayêk sîstematîk îstîsmarê cînsî yê vera domanî’ ra heta 22 serr û 6 aşmî û derheqê Kadîr Îsteklîyî de zî sucê ‘bi hawayêk sîstematîk îstîsmarê cînsî yê vera domanî’ û ‘hêrişê cînsî’ ra heta 67 serr, 10 aşme û 15 rojî cezaya zîndanî dewa ame akerdiş.
Sereştişê polîsan yê Weqfê Hîranurî
Avûkata H.K.G.ye 13ê kanûne de muracatê mehkema kerd û derheqê Kadîr Îsteklî, Yusuf Zîya Gumusel û Fatma Gumusele de waştişê tepiştişî kerd. 2. Mehkemaya Cezaya Girane ya Anadoluye ya Stenbolî derheqê versuc Kadîr Îsteklî û Yusuf Zîya Gumuselî de qerar da ke bêrî tepiştiş.
Sewqê mehkema ameyî kerdiş
Badê qerarê destbendkerdişî polîsan eşet Weqfê Hîranurî yê Sancaktepeye ser. Weqf de kesêk nêame dîyîş. Kadîr Îsteklîyo ke derheqê ci de qerarê tepiştişî esto, Pendîk de ame destbendkerdiş. Sewbîna pîyê H.K.G.ye yanî faîlo bîn Yusuf Zîya Gumuşelî saetanê serê sibayî de ame destbendkerdiş û berdî Şûbeyê Gêrayîş yê Mudirîya Asayîşî ya Gayrettepeyî. Kerdoxî gureyê asayîşî ra dima sewqê Mehemaya Anadoluye ameyî kerdiş.
Roniştişê dewaye 30ê çeleyê 2023î de yo
Mehkemaya Cezaya Girana ya 2. ya Anadolu ke îdîaname qebul kerd seba roniştişê dewaye 22ê gulana 2023î roj dabî. La reaksîyonê rayaumûmî ra dima mehkema qerar da ke roniştişê dewaye 30ê çeleyê 2023î bêro dîyîş.STENBOL
