Roşnvîr û nuştoxo kurd Munzur Çemo ke 11ê kanûne de Berlin de kanserî ra şibi heqîya xo, vizêr dewa Seterî ya qezaya Xorxolî ya Çewlîgî de ame definkerdene. Gruba Xebete ya Vate, Wekîlê HDPyî yê Dêrsimî Alîcan Onlu, îdarekarê Cemxaneyê Duzgun Babayî û xeylêk sîyasetmedar û embazê Munzurî tewrê merasîmî bîyî.
Malmisanijî ke bale ante esaranê Munzur Çemî ser vat: “Têna semedê kirmackî nê semedê tarîx û bawerîya Dêrsimî ser o zî zaf xebatî kerdî. Munzur Çem embazê mi yê 42 serran o. Hem ronayîşê Grûba Vate de hem serê ziwanê kirmanckî de rolêko xurt kay kerd.”
Alîcan Onlu zî vat: “Munzur Çemî çîyê ke ma xo vîr ra kerdî zî vistî ma vîr. Zaf keda ci şarê Dêrsimî ser est a… Coka ganî ma ey ra helalîye biwazê. Munzur Çem heqê xo ma rê helal bikerê. Dewlete waşt ke ziwan û îtîqatê Dêrsimî û wişk bikero la ey sey nameyê xo, sey çemê Munzurî her çî kerd newe, ziwanê ma kerd newe Sereyê Dêrsim û Kurdîstanî weş bo.”
Reyna sîyasetmedar û embazanê Munzur Çemî yê bînan zî derheqê eyde qisey kerd, seba ke keso wina ercîyaye nas kerdo kêfweşîya ard ziwan û bale ante xebatanê muhîman ke ey semedê kirmanckî (zazakî/kirdkî) kerdî ser.
Badê qiseykerdişan Munzur Çem ame definkerdene.
