Komeleya Lêkolînên Koçberiyê ya Serhatê da zanîn ku ji ber sedemên şer, hişkesalî û aboriyê, li seranserî cîhanê hejmara penaberan derket 280 milyon kesan.
Komeleya Lêkolînên Koçberiyê ya Serhatê bi boneya 18’ê Kanûnê Roja Penaberên Navneteweyî li pêşiya avahiya komeleya xwe ya li Wanê daxuyanî da. Gelek nûnerên rêxistinên civaka sivîl jî tev li daxuyaniyê bûn. Di daxuyaniyê de hevseroka komeleyê Gulşen Kurt axivî û da zanîn ku li seranserî cîhanê hejmara penaberan nêzî 280 milyon kesan bûye.
Bi domdarî Kurt anî ziman ku mirov ji ber polîtîkayên nîjadperest, cihêkar û bêedalet ên netewe dewletan direvin û wiha got: “Bi milyonan kesên ji rewşa xerab a aborî, civakî û siyasî ya ji welatên xwe nerazîne, hewl didin ji devera şer û tundiyê dûr bikevin. Bi milyonan kes niha li deverên cuda yên cîhanê penaber an jî koçber bûne. Ev kes rastî helwest û sepanên li dijî rûmeta mirovahiyê tên. Ji ber vê jî her sal bi hezaran penaber û koçcber jiyana xwe ji dest didin.”
Kurt diyar kir ku li bajarên Kurdistan û Tirkiyeyê gef li ser mafê jiyanê yê penaber û koçberan heye û axaftina xwe wiha bi dawî kir: “Li Îzmîrê sê koçber hatin şewitandin û kuştin û li Wanê di qezaya keştiyê de zêdetirî 100 penaberan jiyana xwe ji dest dan. Her wiha hêzên ewlekariyê li navçeya Serayê mînîbûsa penaberan gulebaran kir û zarokekî penaber jiyana xwe ji dest da. Hêj bi dehan bûyerên vî rengî hene. Her wiha kesên di asta neteweyî û navneteweyî de qesbikariya mirovan dikin baş nayên lêpirsîn û nayên cezakirin. Heta ku koçber jiyana xwe ji dest nedin, bi tu awayî nabin mijara lêpirsîn û teqîbatan. Her wiha penaber, li dijî welatên rojavayî weke şantajekê tên bikaranîn. Penaberên ku di vê sermayê de sînor derbas dikin jî bi pereyekê pir kêm tên xebitandin û ji ber tirsa vegerandinê, gelek bûyerên weke qeza, mirin, cînayet û destdirêjiyê tên nixûmandin.”
