Partiya Demokratîk a Gelan (HDP) li Parka 8’ê Adarê ya Êlihê mitînga bi dirûşma “Ji şer û xizaniyê re na” li dar dixe. Hevserokê HDP’ê Mîthat Sancar û hevseroka Partiya Herêmên Demokratîk (DBP) Salîha Aydenîz, parlamenterên HDP’ê Feleknas Ûca, Remziye Tosûn, Necdet Îpekyuz, Mehmet Ruştu Tiryakî, Mûrat Sarisaç, Îmam Taşçier û Huseyîn Kaçmaz, aktîvîstên Tevgera Jinên Azad (TJA), endamên Meclisa Dayîkên Aştiyê, nûnerên rêxistinên civakî yên sivîl û bi hezaran kes tev li mitîngê bûn. Li qada mitîngê pankartên “Jin, jiyan, azadî”, “Li dijî faşîzma qirkirina jinan dem dema azadiya jinan”, “Me bi ciwanî destpê kir, em ê bi ciwanî ser bikevin”, “Zext û binçavkirin nikarin me têk bibin” û “Ciwan li hemberî we serî natewînin” û alên HDP’ê hatin daliqandin.
Çerxa Şoreşê hat xwendin
Mitîng bi berzkirina “Bê Serok jiyan nabe”, “Bijî Serok Apo”, “Jin jiyan azadî” û “Bijî berxwedana zindanan” û bi tililî û coşek mezin dest pê kir. Li qada mitîngê wêneyên rojnamevan Nagîhan Akarsel a ku li Silêmaniyê û sê welatiyên kurd ku li Parîsê hatin kuştin, hatin bilindkirin. Welatî ji 4 aliyan ve herikîn qadê. Welatiyan bi îşaretên serkeftinê û lîlandinê ketin qada mitîngê. Hê jî xelkê Êlihê tê qadê. Her wiha pankartên “Ez Kurd im” û “Me li kolana bi dest xist, em ê li kolanan biparêzin” hatin bilindkirin. Piştî gerandina govendê mitîngê li gel xwendina “Çerxa Şoreşê” bi rêzgirtinê dest pê kir.
‘Em duh jî li vir bûn, em ê sibê jî li vir bin’
Piştre Hevseroka HDP’ê yê Elihê Huseyin Sarik axaftinek kurt kir. Sarik anî ziman ku dirûşma “Jin jiyan azadî” bûye hêviya hemû gelan û wiha got: “Li Kurdistanê polîtîkayên şerê taybet li ser şaredariyan tên meiandin û qyeûm tayînê şaredariyên me tên kirin. Lê em ê wan di hilbijartinan de bişînin. Duh Heskîfê û îro jî Çemê Êlihê dixwazin xwezaya me talan bikin. Em li dijî qirkirina xwezayê ne. Ev ax axa me ye. Ev welat welatê me ye. Roj roja wekhevî, yekitî û xwedî derketiya HDP’ê ye. Em duh jî li vir bûn, em ê sibê jî li vir bin.”
Piştî axaftina Sarik, Koma Rîtmên Azad bi stranên xwe derket ser dikê. Bername dê bi axaftinên Hevseroka Giştî ya DBP’ê Saliha Aydenîz û Hevserokê Giştî yê HDP’ê Mîthat Sancar ve berdewam bike. Herî dawî hûnermend Kadîr Çat derbikeve ser dike.
