Li gorî nûçeya Ajansa Nûçeyan a Firatê (ANF); li bajarê Lille yê Fransayê karkerê kurdistanî yê bi navê Zîkrî Elî Avşîn ku di berberxaneyekê de kar dike, duh bi hêceta li stranên kurdî guhdar kiriye bi êrîşa tirkekî bi navê Ramazan re rû bi rû maye. Avşîn bi sê derbên meqesa berber hatiye birîndarkirin.
Hat zanîn ku Zîkrî Elî Avşîn (27) ji Hewlerê ye. Dema ku li berberxanê dixebitî, ew nijadparestê bi navê Ramazan ê tirk tê dikanê. Ji ber Avşîn li stranên kurdî guhdarî dikir, nijadperestê tirk gef lê dixwe. Li ser bersiva Avşîn a “ez bi zimanê xwe li muzîkê guhdarî dikim” nijadperestê tirk bi meqesa berber êrîşî Avşîn kir.
Hat diyarkirin ku polîsan nijadperestê tirk kiriye binçavan. Zîkrî Elî Avşîn ê birîndar bû jî rakirin nexweşxaneya Lille.
Bi bihîstina bûyerê re kurdistanî ber bi nexweşxaneyê ve çûn. Rayedarên Navenda Civaka Kurd a Demokratîk ên hatin nexweşxaneyê diyar kirin ku bi doktoran re axivîne, kesê birîndar tavilê emeliyat kirine. Rayedaran bal kişand ser nijadperestên tirk ku bi zanebûn dixwazin kurdan tehrîk bikin û provokasyonan bikin û hişyariya ‘ji provokasyonan haydar bin” kirin.
