Kiştox William M.yî 23yê kanûne de paytextê Fransa Paris de, hêrişê Merkezê Kulturê Kurdan ê Ahmet Kayayî kerdbi û Endamê Konseya Rayberdişî ya KCKyî Emîne Kara (Evîne Koyî), hunermmend Mîr Perwer (Mehmet Şîrîn Aydin) û Abdurrahman Kizil qetil kerdî. Kiştox William M. vejîya verê mehkeme. William M. sûcê ‘hedefkerdişê nijadêkî, kiştişê bi armancê nîjadperestî, xîretê kiştişî û peydakerdişê çeke’ ra tepişîya.
Wexto ke kiştox reya diyîne amebi destbendkerdene çarçewa sûcanê ‘sûîkast, xîretê sûîkastî, şîdetê bi çeke û binpaykerdişê qanûnan’ de amebi muhakemekerdene. Konseya Kurdan a Demokratîke ya Fransa û avûkatê keyeyanê Emîne Kara, Abdurrahman Kizil û Mîr Perwerî David Andicî vera pênaseyê sûcî nêrazîbîyayîşê xo mojna û vat ke na dewa sîyasî ya, nêno qebulkerdene ke mehkeme çarçewa sûcanê edlîyan de kiştoxî muhakeme bikera.
CDK-Fyî û keyeyê Mîr Perwerî derheqê Dozgerîya Parisî de dewa akerde. Keyeyê Emîne Kara û Abdurrahman Kizilî zî ewro bi rayîrê avûkatanê xo, seba muhakemekerdişê ‘edlî nîyo, sîyasî yo’ hem derheqê Dozgerîya Parisî de hem zî derheqê faîlî de dewayêke do abikerê. Dîya zanayene ke keyeyê Kizil, Kara û Mîr Perwerî ewro do cenazayan teşhîs bikerê. PARIS
