Kiştox William M.yî 23ê kanûne de paytextê Fransa Paris de, hêrişê Merkezê Kulturê Kurdan ê Ahmet Kayayî kerdbi û Endamê Konseya Rayberdişî ya KCKyî Emîne Kara (Evîne Koyî), hunermmend Mîr Perwer (Mehmet Şîrîn Aydin) û Abdurrahman Kizil qetil kerdî. Serekê Rûmetî yê HDPyî Ertugrul Kurkçuyî hêrişo çekdar ê vera Merkezê Kulturê Kurdan ê Ahmet Kayayî yê Parisî û tecrîdê vera Rayberê Şarê Kurdî Abdullah Ocalanî ANFyî rê ercna.
Kurkçuyî dîyar kerd ke hêrişê çekdarî yê Parisî de teyna menfaetê Anqara est ê û vat: “Anqara her cayo ke tede kurd est o de xo rê sey warê şerî vînena û qerardar a ke stratejîya xo ya nîjadpereste û ‘xeniqnayîşê serewedaritişî’ derbazê 2023î bikera. Anqara bêveng mende û pabeyê îfadeyê verênî yê hêrişkerî bîye. Îfadeyê ‘Ez nîjadperest o, coka mi ê kiştî’ yê hêrişkerî zerrîya Anqara kerde rehet. La di rojan ra dima hêrişkerî vat ‘Mi zanayêne ke ê kurd ê, seba ney mi hêriş kerd. Meqamanê Parisî seba ke cidîyetê rewşe binimnê cade hêrişker eşt timarxane.”
Ganî têkilîya nê terorîstî ya bi Anqara bêra cigêrayene
Kurkçuyî da zanayîş ke ganî têkilîya nê terorîstî ya bi Anqara bêra cigêrayene û domna: “Marine Le Pen bi xo no qirkerdiş şermezar kerd ke no zî mojneno ke îmajê kurdan Fransa de senîn o. Nê cînayetî teyna Anqara rê fayde kenê. Hem provakasyonê ‘bozkurtan’ê ke wextê mîtîngî de vetbi, hem xîretê Wezîrê Pawitişî yê heqdarkerdişê provakatoran û xîretê reşkerdişê bi des hezaran kesan mojnenê ke blokê AKP-MHPyî warê operasyonî yê Qirkerdişê Parisî yê diyînî de cagêno.”
Erdogan wazeno ke CPTyî bêveng bikero
Kurkçuyî bale ant tecrîdê Îmraliyî tewirê CPTyî ser û vat: “Aseno ke Erdogan wazeno ke CPT babeta Ocalanî de bêveng bimano. Heta ke Konseya Ewropa peyê ci de biba ganî merdim nêpawo ke CPT bi sereyê xo vera Tirkîya têbigêro. Çalakîya ke wekîlanê HDPyî verê Wezîrîya Edaletî de kenê çalakîyêka girîng a. Ganî no îşkenceyê Îmraliyî bêro vistene bi rojdemî. Abdullah Ocalan hemwelatîyêkê Tirkîya yo coka ganî pêro wekîlî seba ey têbigêrê.”
