Kiştox William M.yî (69) 23ê kanûne de paytextê Fransa Paris de, hêrişê Merkezê Kulturê Kurdan ê Ahmet Kayayî kerdbi û Endamê Konseya Rayberdişî ya KCKyî Emîne Kara (Evîne Koyî), hunermmend Mîr Perwer (Mehmet Şîrîn Aydin) û Abdurrahman Kizil qetil kerdî. Kiştox William M.yî sewbîna hêrişê restaurantê kurdan û salona kuaforî kerdbî û salonê kuaforî de hetê hemvelatîyanê kurdan ra ameye tepiştiş. Komîteya Rayberdişî ya PKKyî derheqê babete de eşkerayîyêke daye. Eşkerayîye wina ya:
“Eşkerayîya 25ê kanûne ya Merkezê Îrtîbatî û Çapemenîye yê HPGyî ra ma musayî ke dîktatorîya faşîste ya AKP-MHPyî hêzê xo xeylêk noqtayanê Zapî ra antê û remayo. Artêşa tirke ya îşxalkere nê 8 mengan de gerîlayan ra derbê giranî werdî, bi hezaran cenazayê xo nêberdî, pê benzînî vêşnayî la rixmê ney zî pê xoverdayîşê gerîlayan nêeşkaye û remaye. Rejîmê AKP-MHPyî yo faşîst menga 8. ya şerî de şikîya û 25ê teşrîna peyêne ra nata nêeşkeno verê operasyonanê gerîlayan ê şorişgêran de vindero, coka bi desan noqtayî verdayî.
Bêguman na rewşe yena manaya serkewtişê tarîxî ya gerîlayanê HPG û YJA-Starî. Nîşaneya binkewtiş û serkewtişê xoverdayîşê gerîlayan a. Sibata 2008î ra dima no binkewtişo tew pîl o diyîn ê artêşa tirke yo ke Zap de bîyo destpêkê rijîyayîşê faşîzmê AKP-MHPyî û DAIŞî. Faşîzmê AKP-MHPyî yo ke Zap de vera gerîlayan bin kewto, Vakurê Kurdistanî û Tirkîya de vera sîyasetê demokratîkî do bin bikewo.
Nê esasî ser o ma gerîlayanê Zap, Avaşîn û Metîna selam kenê ke serkewtişêko winayên o tarîxî dîyarîya merdimatîye û şarê ma kerdo. Ma şexsê Fermandarîya Qerargehê Merkezî ya HPG û YJA-Starî û Fermandarîya ma de pêro gerîlayanê azadîye fîraz kenê, dewamê nê serkewtişî wazenê. Ma şehîdanê qehremanan ê nê xoverdayîşî bi minet û hûrmetî yad kenê. Nê şehîdan xeta azadîye ya Apogîran de cuyêka newîye ya azade afernaye û temsîlîya ci kerde. Heta ke azadîya cinîyan, estbîyayîşê kurdanê azadan û merdimatîya azade est bê şehîdê ma yê qehremanî zî do tim bibê sembolê bêmergî yê merdimatîya azade.
Ma vînenê ke dîktatorîya faşîste ya AKP-MHPyî seba ke qesasê binkewtişê xo bigêra hêrişê şarê ma yê sivîlî û cinîyan kena, teda û zulmê sîstemê qirkerdişî, tecrîd û îşkenceyî ya Îmraliyî zêdînena, zîndanan kena warê îşkence û mergî, Vakurê Kurdistanî, Tirkîya û teberê welatî de hêrişanê terorî kena. Eşkera yo ke dewaya qefilnayîşê HDP û hêrişê vera DBPyî, tepiştişê kedkaranê çapemenîya azade û hunermendan, teda, îşkence û tepiştişê cinîyanê têkoşeran parçeyê nê hêrişan ê. Hêrişê 23ê Kanûne yê vera Merkezê Kulturê Kurdan ê Ahmet Kayayî, qetilkerdişê milîtana ercîyaye ya partîya ma û Endama Konseya Rayberdişî ya KCKyî Evîne Hoyî û di welatperwerê kurdî Abdurrahman Kizil û Mîr Perwer serebûtêko barbar o ke sey qesasê Zapî hetê dîktatorîya faşîste ya AKP-MHPyî ra ameyo kerdene.
Cergê faşîstî yê AKP-MHPyî kenê ke qesasê binkewtişê xo şarê ma Kurdistanî û teberê welatî ra bigêrê. Dîyar o ke AKP-MHP şarê ma yê teberî û dostanê ma ra terseno, cinîyan ê serkêşan ra terseno. Ma hol zanenê ke Qirkerdişê Parisî yê 23ê Kanûne dewamê Qirkerdişê Parisî yê 9ê Çeleyê 2013î yo. Fermanê nê qirkerdişî hetê Erdoganî ra ame dayene, MÎTî qirkerdiş plan kerd û ard ca. Hukmatê Fransa ganî na raştîye bizano û goreyê na raştîye têbigêro, hesab mesuldaran ra biperso. Eke Qirkerdişê 9ê Çeleyê 2013î bi hawayêkê edîlî biameyêne muhakemekerdene no qirkerdiş do nêbîyayêne. Eke Qirkerdişê 23ê Kanûne bi hawayêkê edîlî nêro muhakemekerdene qirkerdişê neweyî do biqewimîyê.
Şarê ma û dostê ma vera Qirkerdişê Parisî verê xo da Parisî, bîyî yew, wayîrê şehîdanê xo vejîyayî û hewcedarîya komelê demokratîkî û merdimatîya welatperwere ard ca. Înan bi ferasetê xo xîretê provakatîfî çin kerdî. Ma do nê tewir û nêzdîbîyayîşê şarê ma û dostanê ma selam kenê. Heta ke qirkerdiş bêro roşnîkerdene û cergê kiştoxî yê faşîstî Paris û cayanê bînan ê Ewropa de bêrê eşkerakerdene ma pê bawer ê ke nê çalakîyê demokrasî û azadîye do dewam bikerê.
Ma şehîdanê Qirkerdişê Parisî yê Diyînî bi rêzdarî, heskerdiş û minetî yad kenê, dejê keyeyanê înan û pêro şarê ma pare kenê. Kênaya qehremane ya Botanî embaze Evîne Goyî emrê xo da têkoşînê azadîye yê xeta fedayîye ya Apogîre. Aye vera cerganê faşîstan têkoşîn kerd. Her ke şer kerd bîye azad, her ke azad bîye bîye rind û bîye mazharê heskerdişê şarê ma. Ma sey partî û şarî na embaza xo do tim bi rêzdarî yad bikerê, qesasê ci bigêrê û armancanê aye ser bivisnê.
Ma sey şar û têgêrayîşî, cinî û ciwanan, gerîlayanê cinî û camêrdan do tim hayîya ma pê ma bibê. Seke vajîyeno awe vindena la dişmen nêvindeno’ Vera dişmenê namerd û qirkerdişî ma do tim hişyar bibê û amade bibê. No seba şarê ma yê çar parçeyanê Kurdistanî, şar û dostanê ma yê teberê welatî zî derbazdar o. Seba yadkerdişê şehîdanê Parisî ma do tim hişyar, rêxistinkerde, amade û têkoşer bibê. Ganî ma têkoşînê xo yê seba azadîya Rayber Apoyî her cayan de xurtêr bikerê.
Ma şehîdanê xo yê Parisî reyna bi rêzdarî yad kenê û vanê ke têkoşînê xo yê azadîye de ma do tim wayîrê vîrameyîşê înan vejîyê. Ma venga şarê xo û dostanê xo danê ke nê esasî ser o ma bingeyê ney de wayîrê erkanê xo vejîyê, têkoşînê xo yê seba rijnayîşê faşîzmî û şiknayîşê tecrîdî her ca de berzêr bikerê.” BEHDÎNAN
