Paytextê Fransa Parîs de, Mehlaya Strasbourg Saint Denisî de Merkezê Kulturê Kurdan yê Ahmet Kayayî de yew hemwelatîyê Fransizan, bi çeke yew hêrişê kurdan kerdo. No hêriş de, Hunermend Mîr Perwer, Sîyasetkar û Aktîvîst Emîne Kara û Abdurrahman Kizil qetil kerdê, yew birîndaro giran tede, hîrê tenî zî bîrîndar kerdê. Merkezê Kulturê de, 23 Kanûne 2022î de, seba hedreyîya şermizarkerdişê Qetlîyamê 9ê Çeleyê 2013î yew kombîyayîş organîze bîyênî. No hêrîş, na saeta kombîyayîşî de bîyo. Seba problemanê teknîkan ra, no kombîyayîş di saetî wextê xo ra pey beno. Eke no kombîyayîş, di saetî ra pey nêbîynî, yew qetlîmo zaf pîl bîynî.
No qatîl, 12ê Kanûna 2022î de Hepisxane ra bi kefalet vejîno û saeta kombîyayîşî de şono no qetlîyamî keno. Dima Merkezê Kulturê ra vejîno û hêrişê lokantey û berberê kurdan keno. No berber de debançeyê ey qefilêno û ciwanê kurdan ey tewşenê/tepîşenê û teslîmê polîsan kenê. Bellî yo ke no merdim, verî no Merkezê Kulturî û cayê kurdan kifş kerdo. Rayna bellî yo ke saeta kombîyayîşê bonder bîyo. Aseno ke no qetlîyam, qetlîyamêko organîzeyin o, bi plan pratîze bîyo. Xora no merdim, wexto ke hepisxane de beno, yewna ca ra anê, nizdîyê Merkezê Kulturê Kurdan yê Ahmet Kayayî. No hepisxane de zî merdimê DAIŞî estê. Nê merdimî, mehkeme de vato ke, “Mi zanaynî ke no Merkezê Kulturê yê Ahmet Kayayî Mehlaya 10. de yo. Bellî yo ke, verî cayê qetlîyamî de yew kifş kerdo û dima no qetlîyam kerdo. No merdim 2016 de yew hedîseyê dizdey ra sudar beno, yewna het ra 8ê kanûna 2021î de Parîs de, gala/hêrişê yew kampa koçberan zî kerdo, bi kalme di tenî bîrîndar kerdê. No semed ra, yew cezayê ey eya beno û yeno tewiştiş/tepîştiş. Yew serre dima yeno verradayîş. Dozgerê Parîsî Laure Beceeuau vano ke; “No merdim, hêrîş ra yew serre dima verradêno. Çira verradîyayo ez nêzana.” Hem vetişê nê qatîlî de, hem 11 rojan de organîzebîyayîşê ey de, cayê kurdan kifşkerdiş de, peydakerdişê debançeyî û 46 fîşekan de, têkilîya eyo DAIŞî de bi temam yew şik û guman esto. Eke peyê ey de, yew organîzasyono tarî çin bo se, Parîs de 77 netewî/miletî estê, çirê kurdî?
Çi heyf ke polîs û rayberê Fransa cayê hedîseyê de, îzahetê xo de kerdoxê nê hedîseyê se merdimêko nîjadperest name kerdo. Xora verî, se merdimêko psîkopat name kerdo û berdo psîkîyatrî. Doktorê psîkîyatrî, teşhîsê xo de sey merdimêko saxlem dîyo û rapor nuşto. Na ra, no qatîl newe ra ameyo tewiştiş/tepîştiş. Nê merdimî, qetlîyamî ra ver, eraba reyde anê Merkezê Kulturê Ahmet Kayayî ver de ronanê. No hedîse, bi organîze bîyo û yew hedîseyê yê terorîstî yo. 9ê Kanûna 2013î de zî Parîs de Sakîne Cansiz, Fîdan Dogan û Leyla Şaylemez qetil benê. No des serrî yo ke no qetlîyam eşkera nêbîyo. Goya Mehkemeya na dewa, bi limitkî/nimitkî gureye xo kena. Ewta de aseno ke, na Mehkema nêwazena ke, qatîlanê nê hîrê cinîyanê kurdan eşkera bikê/bikerê. Lingeantoxê/tetîkantoxê nê qetlîyamê Omer Guney bi, o zî mireno. Eke destekdayoxê nê qetlîyamê Sakîne Cansiz, Fîdan Dogan û Leyla Şaylemeze eşkera bibîynê, 23ê Kanûna 2022î de no qetlîyamo peynî nêbîynê. Goreyê vatişan; no qatîl, wexto ke hepixane de maneno, têkilîya eyo DAIŞî bîya, DAIŞî reyra dekewto têkilî û bi talîmatê nê Rêxistinê no qetlîyamî kerdo. La goreyê texmînê ma, ewta de DAIŞ zî taşaron o û hetê kamî ra yeno şuxulnayîş bellî yo.
Nê merdimi, yew qûtîya yê 25 fîşekan û hîrê şarjorê dekerdeyan reyde de, no hêriş pratîze kerdo. Şarjorê debançeyî de, hewt hebî fîşekî bibê, kenê 21 fîşêk. Yekunê fîşekan, 46 fîşekî keno. Aseno ke hedef de, yew qetlîyamo pîl esto. Ma cor ra zî îzah kerd, kê wexto ke nê heme kerdeyan û têkilîyanê nê qatîlî anê çiman ver, no merdim tena yew lingeantox/tetîkantox o. No merdim zî sey Omer Guneyî ameyo şuxulnayîş. Aseno ke peydê nê qetlîyamî de yew organîzasyono pîl esto. Ma wazenê ke Hukmatê Fransa, hem qetlîyamî hîrê cinîyanê kurdan û hem zî nê qetlîyamê peyinî zelal biko. Kamî/kaman destek dayo, kamî/kaman organîze kerdo, wa eskera bibê. Ma heq, huq û edalet wazenê. Eke qatîlê nê organîzasyonî eşkera nêbê, nê qatlîyamanê xo ra cesaret gênê û hima zaf qetlîyaman organîze kenê.
